Plunder laban sa Pangulo isinampa sa Ombudsman

Iniharap kahapon ng Volunteer Against Crime and Corruption sa Ombudsman ang kasong plunder o paglulustay ng salapi laban kay Pangulong Joseph Estrada dahil sa umano’y pagtanggap niya ng P400 milyon mula sa suhol ng jueteng lords at ng P130 milyong kickback mula sa tobacco excise tax.

Kasama ni VACC Chairman Dante Jimenez sa pagsasampa ng kaso si Ilocos Sur Governor Luis "Chavit" Singson na tatayong testigo.

Sinabi naman ni Overall Deputy Ombudsman Margarito Gervacio na pag-aaralan nila ang naturang kaso para hindi malabag ang karapatan ng Pangulo sa criminal immunity.

Posibleng mapatawan ng parusang bitay si Estrada kapag napatunayang nagkasala. Binalewala ng Malacañang ang demanda.

Sinabi ni Press Secretary Ricardo Puno na may immunity ang Pangulo at hindi ito maaaring sampahan ng kasong kriminal hangga’t nasa puwesto ito. (Ulat nina Grace R. Amargo at Ely Saludar)