3,000 dayuhan na nag-apply ng amnesty tinaningan

Binigyan kahapon ni Immigration Commissioner Rufus Rodriguez ng hanggang Disyembre 31, 2000 ang 3,000 dayuhang may kabuuang utang na P300 milyong integration fee sa pamahalaan.

Nagbabala si Rodriguez na kakanselahin niya ang residence status, ituturing na iligal at idedeport kapag hindi nagbayad ang naturang mga dayuhang kabilang sa 16,000 iligal na dayuhan na nag-apply ng amnesty sa ilalim ng Alien Social Integration Act of 1995.

Bawat iligal na dayuhan ay pinagbabayad ng tig-P250,000 integration fee para maging legal ang pananatili nila sa Pilipinas. (Ulat ni Jhay Mejias)