Hilomon nga uyab

Dear Tito Miguel,

Maayong adlaw, Tito Miguel. Ako si Danica nga taga Mandaue City ug gusto ko mangayo og tambag bahin sa akong boyfriend nga si Segfred. Introvert kaayo si Segfred. Sa halos tanang higayon, hilom ra siya ug dili kaayo makig-estorya, bisan kung kami rang duha. Dili pud siya expressive sa iyang gibati. Usahay, ako na ang pirming magsugod og conversation, mangutana kung okay ba siya, ug mosulay og pagpaduol niya. Kasabot ko nga dili tanan parehas og personality ug basin mao gyud na iyang kinaiya. Pero usahay, mobati ko nga murag ako ra ang naningkamot nga mapadayon ang among communication.

Kung naa siyay problema, dili siya mosulti. Kung masuko o malain siya, hilom ra. Usahay, dili ko kahibalo kung okay pa ba siya sa among relasyon o naa ba siyay gibati nga wala niya gipadayag.

Tito Miguel, unsaon nako pag-balanse sa pagsabot sa iyang pagka-introvert ug sa akong panginahanglan nga makig-communicate siya nako? Dili ba ko dapat mag-expect nga mahimong mas open siya tungod kay uyab man mi? Gusto ko siyang sabton, pero gusto pud ko nga masabtan niya nga importante para nako ang communication ug emotional connection. — Danica

* * *

Danica,

Talagsaon ang iyang personality, extreme iyang pagkamauwawon o pagkahilomon. Dili raba nimo mapugos pag-usab kay natural na niya. Kun imo na pugson nga managad o makipaghalubilo sa uban, mora’g imo siya gi-torture. Lisod baya kaayo nga ang tawo magpaka-aron ingnon. Makaluya. Pero dili tanan natural insakto o pasagdan na lang. Kay para uban, arte siya o bastos pa gani. Kun dili gyud siya ganahan makig-istorya sa uban, hinay-hinayi’g agni nga maski pagtimbaya lang o pahiyom o panamilit iyang buhaton aron dili mogawas nga wala siya’y pamatasan.

Kun kamo rang duha, hinay-hinaya gihapon. Aron siya mo-istorya, ipaagi’g pangutana para motubag siya. Kay kun igo ra ka magpadayag, lagmit para niya dili kinahanglan motubag. Karon kun dili gihapon mo open-up maski unsaon nimo’g pangutana, pasagdi lang. Kay ang tinuod, siya mismo sa iyang ilawom nagkalisod na. Gusto niya makig-istorya, apan dili niya kaya.

Suwayi nga hilom ra ka, panid-i kun unsa iyang buhaton. Magtinutokay na lang ba mo, o mapugos siya’g istorya kay nihilom ka. Kun di gihapon mo-istorya o mangutana ngano ka, pangutan-a kun ing ana na lang ba mo pirmi. Sa maong paagi, makita niya nga dili insakto kun wala’y komunikasyon.

Pero’g dili gihapon mausab, angay na ka magduha duha, kaya ba nimo makig-relasyon sa tawo nga hilom pas amang? Kun magpadayon ka sa tawo nga dili mo-istorya, kinahanglan mananag-an ka, aron iyang hunahuna o gibati mabasa nimo. Pero yuna ra, kun hilomon kaayo siya, giunsa niya pagpanguyab kanimo? — Tito Miguel

Magpatambag ka? Ipada kang Tito Miguel: 0991-318-9366