Solenn pasok sa "Sang'gre"
![Solenn pasok sa "Sang'gre"](https://media.philstar.com/photos/2024/07/11/2_2024-07-11_00-51-33.jpg)
CEBU, Philippines — Opisyal na nga gianunsyo nga malakip si Solenn Heussaff sa "Sang'gre" ug pabilin niya nga dalhon ang karakter niya kaniadto sa "Encantadia" nga Cassiopeia, ang kaluha sa kontrabida nga si Mitena.
Ang maong taho kay gipahibalo sa direktor sa maong proyekto nga si Mark Reyes ug nipadayag kini og, "Avisala Hara Cassiopeia!" Gikalipay niya og maayo nga human sa walo ka tuig, subli niya nga makita ang karakter ni Solenn .
"Solenn is also nervous about spewing the mytical 'Enchan' dialogues after all this time. But I'm sure she’ll nail it once again because once a Sanggre, forever a Sanggre!" sa direktor pa.
Julia dunay upcoming series
Malipayong gitaho ni Julia Montes nga duna siya’y umaabot nga teleserye ug sugdan na ang taping niini sa dili madugay.
Suma pa sa aktres nga doul kini sa iyang dughan ug makonsiderar niya kini nga big project. Dugang pa ni Julia nga daghan gyud nga mga pagtulun-an ang makuha sa maong teleserye.
BINI Aiah na-discover sa audition sa Darna
Sa wala mahimong miyembro sa BINI, gitingoha gyud diay ni Aiah Arceta nga mahimong housemate sa Kapamilya reality show nga Pinoy Big Brother apan wala siya nadawat sa audition niini nga gipahigayon kaniadto dinhi sa Sugbo.
Sa interview ni Aiah sa online show ni Melai Cantiveros nga Kuan On One, gibutyag sa Cebuana performer nga big fan gyud siya sa maong reality show sa ABS-CBN.
Nahinumdoman pa niya nga naabtan gyud siya og tungang gabii sa pag-audition niya sa PBB ug mao kini ang edition kun diin nahimong official housemates ang kauban niya nga BINI members nga sila si Gwen ug Sheena .
Human wala madawat sa PBB, ni-audition usab si Aiah aron mahimong kabahin sa Darna ug wala gihapon siya madawat, apan mao kini ang nahimong taytayan nga nabatyagan sa Star Hunt ang iyang kaanyag.
Pipila ka buwan human sa audition sa Darna, gitawagan siya sa Star Hunt ug gitanyagan nga mahimong kabahin sa usa ka all girl group nga BINI.
Jen ug Dennis nagtukod og production company
Naghimo og kaugalingong production company nga ginganlan og Brightburn Entertainment ang magtiayong Jennylyn Mercado ug Dennis Trillo .
Nag-post si Jennlyn og hulagway sa Instagram kun diin katupad nila ang mga kadagkoan sa Netflix Philippines nga usa sa ilang mga partner sa umaabot nila nga mga proyekto..
"After 20 years in the industry, Dennis and I are trying on new hats, this time as producers," caption pa ni Jennylyn sa maong hulagway.
Gipahimagnoan sa manager
Nag-viral ang sexy dance video ni Jackie Gonzaga nga kuha atol sa pagsuroy niya sa usa ka bar sa San Juan, La Union. Nakadawat og text message si Jackie gikan sa iyang manager nga si Vice Ganda ug gipahimagnoan siya niini nga magmatngon sa iyang mga lihok ilabi na nga usa na siya ka public figure . Suma pa ni Jackie nga wala ra masuko si Vice ug igo lang kini nipadangat sa concern niini ngadto kaniya.
Sheryn milugwa sa Palaro
Ni-perform ang Cebuana singer nga si Sheryn Regis sa opening ceremony sa Palarong Pambansa 2024 niadtong Martes didto sa Cebu City Sports Center . Nilingaw pud sa nanambong sa maong kalihokan ang boy group nga Alamat.
Miklaro sa isyu
Giklaro ni Jed Madela nga wala siya’’y giigo sa bag-ong awit niya nga nag-ulohan og "Wish U The Worst". Matud pa sa singer nga laing tawo ang nagsulat niini busa tataw nga wala siya’y gipadungog-dungog sa maong awit. Mao kini ang tubag ni Jed sa pasangil sa iyang kanhi manager nga si Annie Mercado nga matud pa gipikhan kini sa maong awit. Gitataw ni Jed nga mapasalamaton siya sa iyang kanhi manager sanglit mao gyud kini ang nagtabang kaniya sa pagsulod sa industriya.
- Latest