Mavs Buhi Pa

CEBU, Philippines — Gikulata ang Celtics sa Game 4 sa NBA Finals

Nasayud nga wa nay ugma nga nagpaabot kanila kon ugaling mapilde na sab sila, ang Dallas Mavericks milusad og bangis kaayong panimalos batok sa karibal nilang Boston Celtics.

Si Luka Doncic mi-iskor og 21 sa iyang 29 puntos sa first half samtang si Kyrie Irving midugang og 21 puntos sa dihang gidominar sa Mavs ang Celtics, 122-84, sa Game 4 sa NBA Finals kagahapon didto sa American Airlines Center sa Dallas, Texas.

"We knew we have to get it, we can't lose no more. As we always say, we're going to believe until the end," matud pa ni Doncic.

Bukid pa hinoon ang tungason sa Mavs gumikan kay dako pa gihapon ang labaw sa Celtics nga nagkupot og 3-1 nga baraha.

Sa kasaysayan sa NBA, wala pay team nga nadaog human malubong og 3-0 sa usa ka best-of-seven series.

Mao kini ang buot nga barawon sa Mavs human sila mipuwersa og Game 5 nga gikatakda karong Martes, Hunyo 18 (oras dinhi sa Pilipinas) didto sa TD Garden sa Boston, Massachusetts.

Dominante kaayo ang Mavs nga sa usa ka higayon mi-abante og 48 puntos sa katapusang kuwarter.

Ang 38 puntos nilang demolisyon sa Celtics maoy ikatulong labing dako nga daog sa kasaysayan sa NBA Finals sunod sa 96-54 nga paglampaso sa Chicago Bulls sa Utah Jazz niadtong 1998 ug sa 131-92 nga paglampornas sa Celtics sa Los Angeles Lakers niadtong 2008.

Dako sab og naambag sila si Tim Hardaway Jr. ug Dereck Lively II sa paghatag og laing kinabuhi sa Mavs.

Si Hardaway mibubo sa tanan niyang 15 puntos sa katapusang kuwarter samtang si Lively mikadlit og 11 puntos ug 12 ka rebounds.

Sa habig sa Celtics, namugnaw ang duha nila ka mga bitoon.

Si Jayson Tatum mihipos lamang og 15 puntos samtang si Jaylen Brown nalimitahan ngadto sa 10 puntos.-