Erich ug Julia nag-away?

CEBU, Philippines — Gisumsoman karon sa mga himantayon ang pagkawala  ni Erich Gonzales sa listahan sa Instagram followers  ni Julia Barretto. Nitumaw ang mga spekulasyon nga naputol na ang panaghigalaay sa duha.   Taod-taod na nga suod nga maghigala sila si Erich ug Julia busa seguradong ikakugang  sa ilang fans kun pananglitan nagbikil ang maong duha ka aktres.

Wala magdahom

Gibutyag sa usa sa mga miyembro sa BINI nga si Mikha Lim nga wala gyud damha sa iyang grupo ang nagsagunson nila nga kalamposan sa Spotify.Ang maong  OPM group kay hingpit na nga nakasulod sa  Top Artists Global Chart sa Spotify ug nasurpresa sila og maayo niini.  Nasayran nga nagpungasi ang popularidad sa maong grupo ug kanunay gyud kagubtan ang ilang mga awit.

Kutob ra sa MU

Giangkon ni Romnick Sarmenta nga naabot sa “mutual understanding”   level ang   istado nila kaniadto sa iyang kanhi ka- love team nga si Sheryl Cruz. Apan wala nila kini seryosoha  gumikan kay mga bata pa sila niadtong higayona.  Kahinumdoman nga usa sa mga sikat nga magka-love team niadtong 1980’s kay sila si Romnick ug Sheryl.

Jolina ug Marvin dunay reunion movie?

Niulbo ang  taho nga posibleng  madayon ang reunion movie nila ni Jolina Magdangal ug Marvin Agustin .

Nagkita ang kanhi magka-love team   kauban ang  award-winning filmmakers nga sila si  Antoinette Jadaone ug Dan Villegas sa niaging adlaw.

Gi-post ni Jolina ang ilang  group photo sa  Instagram ug aduna kini caption nga  “Hmmmm…” Nikomento si Marvin  sa maong hulagway og   pinakugang nga  emoji .

Sa comments section ,  nipadayag sa ilang paghinam-hinam  nga makakita og balik sa ilang tandem mao sila si   Camille Prats, Lovi Poe, ug  Melai Cantiveros.

Pipila sa sikat nila nga mga pelikula  kaniadto mao ang  “Labs Kita... Okey Ka Lang?” “Hey Babe!” ug  “Flames: The Movie!” .

Nahimo usab sila nga kabahin sa TV  series nga  “Gimik” ug  “I Luv NY.”

Marian wala mangayo og ka-double

Naghinam-hinam na si Marian Rivera sa mahimong resulta sa iyang Cinemalaya film nga "Balota".

Duna siya’y   fight scene sa maong proyekto  ug wala gyud siya nangayo og ka-double.

Gani nakabaton siya og mga pangos gumikan sa maong eksena, apan wala ra siya manumbaling niini sanglit gibuhat gyud niya ang tanan aron matarong gyud niya ang iyang mga eksena.

Bahala og magkamang basta maka-kanta

Determinado gihapon si  Celine Dion nga maka-kanta og balik sa entablado  bisan pa man nga duna siyay gihambin nga sakit .

Buhaton niya ang tanan kutob sa iyang mahimo, bisan magkamang pa siya aron lang gyud maka-perform siya og balik.

Ang singer maoy nagpasikat sa awit nga  "My Heart Will Go On" ug aminado siya nga gimingaw na siya og maayo sa pagkanta.

KimPau gikagobtan sa Dubai

Gihangop sa ilang fans didto sa Dubai ang mga bida sa “What's Wrong with Secretary Kim” nga sila si Kim Chiu ug Paulo Avelino .

Ni-perform  ang duha sa usa ka kalihokan nga gipahigayon  sa Dubai World Trade Center.

 Ang ilang tandem kay nailhan sa  kadaghanan  isip KimPau nga unang nisikat sa seryeng  Linlang.

“Maraming maraming Salamat Dubai! Salamat po sa mainit na pagtanggap, for attending the show and lastly for supporting #Linlang and #WhatsWrongWithSecretaryKimPh,” Instagram post ni Kim.

Jin sa BTS nakahuman na sa military service

Nakahuman na sa  military service  kagahapon ang K-pop star  nga miyembro sa BTS nga si  Jin  busa makabalik na kini sa showbiz.

Nadestino  si  Jin sa  army base sa  Yeoncheon ug naghinam-hinam na siya  sa umaabot  nga mga proyekto sa iyang grupo.

Puwerting lipaya  ni Jin kay nahimamat dayon niya kagahapon  ang mga kauban niya sa BTS nga sila si  J-hope, V, RM, Jungkook ug Jimin.

Albie ug iyang anak nag-abot na

Sa labing unang higayon , nahimamat na gyud sa aktor nga si Albie Casiño ang iyang anak.

Gipaambit niya ang video sa pag-abot niya sa  San Francisco International Airport kun diin malipayon siya nga gisugat   sa iyang non-showbiz girlfriend nga si Michelina nga nagbitbit sa ilang  anak nga lalaki nga ginganlan og Roman Andrew.

"A great man told me 'being a dad has no days off and retirement' I wouldn’t have it any other way.I finally got to meet my son. Hello Roman Andrew the world is yours little man,” caption pa ni Albie sa gi-post niya nga video.