Beautiful Friday #“Shopanissims

CEBU, Philippines — Normal na sa usa ka bayot ug transgender ang pagka-jolly ug “fun to be with” niini hinungdan nga daghan gyud ang malingaw ug gustong makig- bonding-bonding nila.

Pipila sab kanila gigasahan og extra talent nga maoy nahimo nilang hinagiban sa matag adlaw nilang pagpakabuhi ning kalibutan.

Sama ni Jason John Alejado o mas naila sa kadaghanan isip Carla Mae nga lumad nga taga Perrelos, Carcar City.

Baynte ka tuig na siyang nahimong makeup artist busa dili na basta-basta ang iyang abilidad sa pag-enhance sa kaanyag sa usa sa katawo.

Sulod sa maong katuigan ubay ubay na nga mga personalidad ang iyang napaanyag ug kini sama nila  Jonalyn Viray, Joross Gamboa, Raymond Gutierrez, Solenn Heussaff, Elmo Magalona, Cheska Garcia ug daghan pa.

Gawas sa mga inilang tawo nga misalig kaniya sa pagpaanyag, mga dagkong kompanya sab dinhi sa Sugbo ang iyang nasudlan diin nahimo siyang empleyado niini.

Sulod sa taas nga panahon, siya ang nahimong official makeup artist kaniadto luyo sa kaanyag ug katahum sa mga anchor sa Balitang Bisdak sa GMA–7, ingon man usab ang morning show kaniadto sa maong network nga Buena Mano.

Milabay ang katuigan, padayun ang iyang pagpanimpad ug gidala siya sa kapalaran sa balwarte sa Kapatid Network, o TV5 dinhi sa Sugbo diin siya'y nahimong official makeup artist sa mga personalidad sa Aksyon Bisaya sud sa kapin lima ka tuig hangtud nanamilit na kini sa kahanginan.

Dili ikalimod nga to the highest level ug pang TV na ang iyang pagka makeup artist human sa duha ka mga dagkong TV network ang nisalig kaniya.

“Para nako everyday nimo makab-ot ang imong break as a makeup artist basta everyday sab nimo paninguhaun nga ma-please nimo ang imong mga kliyente through your work,” saysay pa niya.

Dugang pa ni Carla Mae, bata pa lamang siya namatikdan na niya ang iyang pagka artistic sanglit ganahan man gyud kaayo siyang mo makeup hangtud nga nabaid siya dinhi sa kaugalingun lamang niya nga pagpaninguha.

Usa lamang ang tinguha ni Carla Mae sa matag panahon nga mag-makeup siya, ug kini mao ang pagpagawas sa linahi nga kaanyag sa iyang mga kliyente.

Mapasigarbuhon sab nga gipaambit niya karon nga mu-design sab siya og  mga  gown ug wedding dress.

Pagpabuhagay pa ni Carla Mae, tungod sab sa iyang kinitaan sa pag-makeup, nakasustener siya sa pagpa-eskwela sa iyang mga pag- umangkon sa kolihiyo.

Ang maong higayun maoy gikonsidera niya isip usa sa labing matam-is nga kadaugan nga iyang naangkon isip usa ka makeup artist.

“Dako kaayo ang akong utang kabubut-on sa tanan nakong mga customers. Kay sila man ang reason nganong nagpadayon pako as a makeup artist. Sila sab ang naghatag nako og name. Thank you “My Creations”. Many thanks “Shopanissims,” panapos pa niya. - Jaypee Pleños Lao