Daniel, nakawatan

CEBU, Philippines — Gikawat kagahapon ang mga importante nga mga dokumento ug ang pitaka sa aktor nga si Daniel Matsunaga samtang nagbiyahe na padung dinhi sa nasud gikan sa Singapore. Ang aktor miingon nga gisipit niya ang iyang mga gamit duol lang gyud kaniya samtang siya natulog sa eroplano. Gibutyag ni Daniel nga wala siya tabangi sa mga airline staff mahitungod sa maong insidente.

Naglisod kaniadto

Emosyonal nga gitubag sa That’s My Bae member nga si Miggy Tolentino kon unsa na ang iyang napundar karon nga anaa na siya sa showbiz. Matud pa niya nga tanan niyang matigom nga kwarta, ideritso kini niya og hatag sa iyang pamilya aron makapalit na sila sa ilang mga panginahanglan sa balay. Giangkon niya nga kadtong wala pa silay igong kwarta, manghuwam lang sila og washing machine sa ilang silingan. Dugang pa niya nga mihunong usab siya sa pag-eskwela aron ang iyang mga igsuon mao ang makapadayon.

Tanduay girl

Si Erich Gonzales na karon ang bag-o nga model ug endorser sa Tanduay. Siya ang mahimong calendar girl sa maong brand karong 2018.

Joke ra diay

Gikataw-an na lang ni Nadine Lustre ang tsika nga nagsabak siya. Igo na lamang siya nangutana kun diin gikan ang maong taho. Matud pa ni Nadine nga komedya ra nila ni James nga aduna na silay anak puhon.

Back-to-back win

Back-to-back win ang nahimong show sa Miss Asia Global 2017 niadtong Nobiyembre 21 sa Kerala, India human nga pabilin nga nagrayna ang Pilipinas sa maong titulo. Gipasa na ni Trixia Marie Marana (Miss Asia Global 2016) ang iyang trono ngadto sa bag-ong tighupot sa titulo nga si Mary Eve Adeline Escoto.

Target ni Jean

Wala nay gana nga mangita og lovelife ang aktres nga si Jean Garcia human sa tulo ka tuig nga napakyas sa pagpakigrelasyon. Gani, lifetime partner na ang iyang target karon nga 48 years old na siya. “Gusto ko... kung magkakaroon man ako ng next na boyfriend, yung lifetime na. Kung hindi lang, huwag na lang”, suma pa ni Jean.

Gusto magdungan og kaon

Gisugdan na og tukod ang balay sa Kapamilya aktres nga si Julia Barretto nga anaa lang nahimutang duol sa panimalay nila karon. Matud pa ni Julia nga niadtong miaging buwan lang siya mipalit sa maong luna dapit sa ilaha. Gitug-an niya nga gusto lang siya nga duol lang sila og pinuy-anan sa iyang inahan nga si Marjorie aron magdungan lang sila og kaon matag adlaw.

Exclusively talking

Exclusively talking lang ang paghulagway ni Maris Racal ngadto sa ilang relasyon sa teen singer nga si Iñigo Pascual. Tsika pa ni Maris nga lahi ra kini sa exclusively dating ug getting-to-know-each-other ang anaa nilang duha sa singer.

Na-depress sa intriga

Giangkon sa Kapuso talent nga si Jeric Gonzales nga nakasinati na sab siya og depresyon human siya napasanginlan nga aduna siya’y cyber scandal. Matud pa ni Jeric nga wala gyuy  kamatuoran nga lakip siya sa maong scandal apan na-depress siya sa taman gumikan kay adunay mga tawo nga mopataka lang og himo og intriga. Dugang pa niya nga dili kaayo siya gusto nga mopadayag sa iyang mga problema sa iyang pamilya mao nga iluom na lang niya kini.

Gipahimangnuan si Sarah

Tsika pa ni Matteo Guidicelli nga naapektuhan siya sa dihang nakakita sa eksena sa iyang girlfriend nga si Sarah Geronimo ug John Lloyd Cruz sa pelikula nga Finally Found Someone nga hugot nga gigakos ni Sarah si Lloydie. Matud pa niya nga human sila nanan-aw sa pelikula, gipahimangnuan niya si Sarah nga dili kaayo magpalabi og gakos sa lalaki kun dili kini sugo sa direktor. “Dapat sa totoong buhay, hindi dapat ganyan or else... Sa movie or sa trabaho, okay lang ‘yan”, suma pa ni Matteo. (BANAT NEWS)