It’s all about her: September 8, birthday ni Mama Mary

CEBU, Philippines - Ang simbahang katoliko mosaulog sa birthday ni Mama Mary ugmang adlawa, Septiyembre 8. kining maong petsa maoy ikasiyam ka buwan gikan sa December 8, nga diin atong gisaulog ang Immaculate Conception.

Basi sa “protoevangelium of James” nga sinuwat niadtong second century, si Mama Mary anak nila ni Saint Joanchim ug St. Anne. Ang iyang amahan naggikan  sa adunahang pamilya nga sakop sa 12 ka tribo sa Israel.

Suma pa sa artikulo nga gimantala sa catholic news agency (can), si St.  Joanchim  ug St. Anne, dugay nga nakabaton og anak hinungdan nga ila gyung gipangayo sa ginoo nga makaanak sila pinaagi sa hugot nga pag-ampo ug pagpuasa. Gidungog sa kahitas-an ang ilang pag-ampo ug gihimugso ang usa ka anak nga babaye nga mao ang mahal nga birhen maria. Si St. Augustine mihulagway sa pagkatawo sa mahal nga birhen  nga usa ka makasaysayanon og maoy sinugdanan og pasiuna sa pagkatawo usab ni Jesukristo nga atong manluluwas.

Nunot ning maong kasaulugan sa adlaw’ng natawhan ni Mama Mary, gipaabot ang pagdagsa sa mga tawo ugmang adlawa sa mga simbahan lakip na sa castle ni Mama Mary sa Lindogon, Simala nga kanunay’ng gidugok sa mga devotee human kini nagpakita og talagsaong panghitabo sa nanglabay’ng katuigan lakip na niadtong Sept. 8,1998 ug Sept. 8, 1999 nga  diin nasaksihan ang pagtulo sa luha sa imahen sa mahal nga birhen diha sa Lindogon, Simala. Usa ka holy rosary vigil ang himoon karong gabii sa mahal nga birhen sa Lindogon, Simala ug ugmang adlawa, alas 10 sa buntag, usa ka Pontifical Mass ang ipahigayon uban ni Archbishop Jose S. Palma, ang Arsobispo sa Sugbo. Ugma sa hapon, September 8, sa alas singko sa hapon ipahigayon didto sa Lindogon, Simala  ang Grand Marian Procession.

Atangi sa sunod guwa karong Sept. 14, ang schedule sa pagbisita ni mama Mary sa Lindogon, Simala sa Archdiocese sa Sugbo. (BANAT NEWS)