CEBU, Philippines - Miulbo ang report nga matud pa nagplano karon ang Star Cinema nga sila si Coco Martin ug Jennylyn Mercado maoy ilang pambato sa Metro Manila Film Festival 2016. Wala pa hinuo’y ideya ang nahisgutan nga mga artista sa maong plano sa Star Cinema.
Richard maghubo
Gipasigarbo ni Richard Yap nga duna siya’y eksena nga naka-topless sa pelikulang The Achy Breaky Hearts kung diin kauban niya sila si Ian Veneracion ug Jodi Sta. Maria. Sa maong eksena nitusmaw siya sa tubig ug usa kini sa angayan atngan sa iyang fans.
Ian nagpanikad na
Nagpanikad na si Ian Veneracion sa umaabot niya nga serye sa ABS-CBN gumikan kay iyang makauban sila si Bea Alonzo ug Iza Calzado. Dakong garbo alang kang Ian nga makauban sa proyekto ang nahisgutan nga mga aktres.
Bomb threat
Giuswag ang concert ni Alden Richards nga AldenVasion , nga himuon unta sa The Laus Group Events Centre, San Fernando, Pampanga, karong June 24. Giseguro sa mga organizer ang seguridad ni Alden ug sa mga tawong motan-aw niini human sila nakadawat og bomb threat .
Robi ganahan magkomedyante
Kung madayon ang remake sa Palibhasa Lalake, gusto ni Robi Domingo nga malakip sa maong proyekto. Gusto suwayan ni Robi ang maong klase nga show.
Wala damha
Wala damha ni Beauty Gonzales nga mabanhaw pa og balik ang iyang showbiz career. Human nanganak ang aktres, gatoo kini nga wala na siya’y balikan sa showbiz. Nalakip ang aktres sa pelikulang The Achy Breaky Hearts." Akala ko hindi na ako makakabalik," hirit pa ni Beauty.
Anak ni Ate V
Nagmaya si Jasmine Curtis-Smith human niya masayri nga makauban niya ang multi-awarded actress nga si Vilma Santos sa sunod niya nga pelikula. Modala siya isip anak sa Star For All Season. “Actually when we had a meeting, nagulat ako na siya 'yung binanggit na actress. Sabi ko, ‘Are you sure about this?’ My gosh naka-work ko na si Superstar, tapos ngayon ka-work ko naman si Ate Vi na favorite ni mommy. I was beyond happy not only for myself but naisip ko, my gosh, my mom will definitely come home for this. Ako, swerte ko lang. I’m very thankful,” saysay pa niya ngadto sa ABS-CBN News.
Sinungaling Mong Puso
Sila si Rhian Ramos ug Rafael Rosell maoy mga bida sa seryeng Sinungaling Mong Puso sa GMA-7. Mao kini ang gikatahong mohulip sa naghinapos na nga Hanggang Makita Kang Muli.
Pasudlon sa Hollywood
Target sa magtiayong Dingdong Avanzado ug Jessa Zaragosa nga mag-artista sa Hollywood ang ilang anak. Nagplano karon ang magtiayon nga mobalik og puyo sa Amerika gumikan sa maong plano.
Cacai ug Ahron nagbuwag
Gipadayag ni Cacai Bautista nga nakahukom na gyud sila ni Ahron Villena nga putlon ang ilang espesyal nga tinagdan sa usa’g-usa, Wala gyud moangkon ang duha sa ilang istado , apan gitataw ni Cacai nga “special” gyud si Ahron sa iyang kinabuhi kaniadto. “Whatever it was, it was special and we were happy,” suma pa sa komedyanteng actress.
Wala maghuna-huna og award
Gitataw ni Jake Cuenca nga ihatag gyud niya ang tanan niya nga mahimo aron matarong ang iyang pag-arte sa matag proyekto nga iyang madawat. Dili siya maghuna-huna og acting award aron dili siya ma-pressure. Bonus na lang alang kaniya kung makadawat siya og award.
JC ug Shaina sa MMK
Sila si JC de Vera ug Shaina Magdayao maoy magpares sa upcoming episode sa Maalaala Mo Kaya kung diin modala sila isip ginikanan sa bata nga duna’y sakit.
Gipadayag sa duha nga dili lalim ang maong episode gumikan kay napuno kini sa hinilakay nga mga eksena.
Makauban nila sila si Aubrey Miles, Dante Ponce, Aiko Climaco, Bernadette Allyson, Kenzo Gutierrez, , Miko Raval ug ubos kini sa direksyon ni Dondon Santos.
Jadaon gihapon ang direktor
Gibutyag ni Direk Antoinette Jadaone nga siya gihapon ang mogama sa follow-up TV series nila ni James Reid ug Nadine Lustre sa ABS-CBN.
Kahinumduman nga kusog kaayo sa viewers ang On The Wings of Love busa giseguro sa direktor nga mohangop gihapon ang mga tawo sa bag-ong serye sa JaDine.
"Nagkaroon na po ng story conference ang Dreamscape and nagkita-kita na kami ulit nina James and Nadine at excited na po kami dito sa bagong project," saysay pa sa direktor ngadto sa Push.com.ph.
Suma pa ni Direk Antoinette nga duna na’y lawom nga tema ang sunod nga proyekto sa JaDine. "Itong bagong teleserye ganun din, it’s about love, friendship and family, pero one notch higher in the sense na mayroon siyang statement, mayroon siyang gusto sabihin at iparating. I think it is very timely na itong Jadine malayo na ang narating nila," saysay pa niya.
Anne ug Luis nag-duet
Nag-duet ang maghigala nga sila si Anne Curtis ug Luis Manzano atol sa commercial break sa It’s Showtime.
Matud pa nga igo lang nibisita si Luis sa studio sa maong show ug gikalingawan nila ni Anne ang pagkanta og "Bakit Ngayon Ka Lang".
Gi-post ang maong video sa Facebook page sa Tawag ng Tanghalan ug nagbaha na ang likes ug shares niini.
Jodie ug Jolo nagbuwag
Human sa pipila ka buwan nga espekulasyon, gikumpirmar ni Jodi Sta. Maria nga buwag na sila ni Cavite Vice Governor Jolo Revilla.
“We are no longer together, but we are friends,” suma pa sa aktres.
Ang duha nagkauyab niadtong 2012 ug makadaghan na nga na-isyu nga nagkahanap ang ilang relasyon.
Wala na hinuon modetalye si Jodi sa rason sa ilang breakup gumikan kay ang labing importante alang kaniya nga magtagad gihapon sila niini.
Samtang si Jolo sa iyang bahin, iyang gitataw nga silang duha ang nakahukom sa pagputol sa ilang relasyon.
“I wish her the best,” suma pa ni Jolo.
Karon nga wala na’y uyab si Jolo, target niya nga mo-focus na lang sa politika partikular na sa pag-alagad sa iyang mga konstituwente sa Cavite. (BANAT NEWS)