CEBU, Philippines - Gikatahong mobalik na sa tunga-tungang bahin sunod buwan si Marian Rivera sa Sunday PinaSaya sa GMA-7. Suma pa nga gimingaw na og maayo ang aktres sa maong show. Kahinumduman nga temporaryong nipahuway si Marian sa maong programa human niya gihimugso ang anak nila ni Dingdong Dantes nga si Maria Letizia.
Major twist sa OTWOL
Gibutyag sa mga bida sa On The Wings of Love nga sila si Nadine Lustre ug James Reid nga duna’y “major twist” nga mahitabo sa istorya sa maong serye. Suma pa sa duha nga gituyo kini aron masurpesa ang ilang fans sa umaabot pa nga mga serye.
Magsugod sa Valentine’s Day
Malipayong gibutyag ni Eugene Domingo nga karong February 14 o Valentine’s Day na magsugod ang bag-o niya nga show sa GMA-7 nga Dear Uge. Suma pa sa komedyanteng aktres nga seguradong malingaw ang viewers niini gumikan kay magbaha ang celebrity guests nga modalit pud og komedya.
Mahuman na gyud
Mahuman na sunod semana ang shooting sa pelikula nila ni Aljur Abrenica ug Louise delos Reyes nga Hermano Puli .Nagpanikad na si Aljur alang sa pagpasalida niini sa mga sinehan. Wala pa’y tataw nga playdate sa maong pelikula.
Drayber gipasaylo na
Gipasaylo na sa GMA news reporter nga si Howie Severino ang jeepney driver nga nakabangga kaniya samtang nagsakay siya og biseklita paingon sa GMA Network Center. Wala hinuon nakabaton og major injury ang maong TV reporter.
Birthday surprise
Mapasalamaton si Kylie Padilla sa tibuok cast ug crew sa seryeng Buena Familia gumikan kay gidalitan siya og birthday surprise niini. Nakugang na lang og kalit ang aktres sa kadaghang pagkaon sa set sa maong serye.
Pia sa Super Bowl
Si Miss Universe 2015 Pia Wurtzbach maoy correspondent sa Inside Edition alang sa Super Bowl. “I am very excited. I think it’s a great compliment,” suma pa sa beauty queen.
Tinagoang talento
Nalakip ang mga mugna ni Star Magic head Johnny Manahan isip visual artist sa art exhibit sa National Gallery didto sa Singapore. Ang maong exhibit nagpakita og mga ideya sa Southeast Asian art panahon sa 1970s.
Gown ni Pauleen
Ang fashion designer nga si Francis Libiran maoy nagama sa wedding gown ni Pauleen Luna. Gimugna niya ang classic design ug matud pa molutaw og samot niini ang kaanyag sa aktres.
Coco apil sa nagplano
Giangkon ni Coco Martin nga gawas nga bida siya sa seryeng Ang Probinsyano, miyembro usab siya sa creative team niini. Usa siya sa naghatag og ideya nga modala isip Paloma. Ang maong babaye niya nga karakter nakaangkon og grabeng atensyon sa viewers.
Diego nagpa-cute ni Sofia
Giklaro ni Diego Loyzaga nga maghigala ra gyud sila ni Sofia Andres apan iyang gitataw nga malipay siya kung ang aktres ang iyang kauban. Nasayran nga midiskarte karon si Diego kang Sofia.
Angel ug Luis nagbuwag?
Mikisaw karon ang taho nga matud pa nagbuwag na sila si Angel Locsin ug Luis Manzano .
Kahinumduman nga nag-uban pa sila si Angel ug Luis sa U.S. ug gidungan nila pagsugat ang bag-ong tuig uban sa amahan sa TV host-actor nga si Edu Manzano ug ang mga igsuon niya nga sila si Addie ug Enzo.
Kahinumduman nga nagkauyab sila niadtong 2007, ug nagkabuwag niadtong 2009 ug gihilom ang rason sa ilang breakup.
Human sa pipila ka tuig nga wala’y komunikasyon, nibalik ang gugma nila sa usa’g-usa ug nagkabalik sila niadtong February 16, 2014.
Suma pa sa tinubdan sa PEP.ph (Philippine Entertainment Portal), nakabantay kini nga murag duna’y problema ang mag-uyab, ilabi na ang pagtulo sa luha ni Angel matag break sa taping sa Pilipinas Got Talent Season 5 kung diin usa siya sa mga hurado.
Aduna’y mga pagduda nga ang panagbuwag nila ni Luis maoy rason sa paghilak ni Angel.
Usa pud kini sa rason kung nganong emosyonal pud si Angel sa on-cam taping sa maong show.
Sa episode niadtong Domingo duna’y deklarasyon ang usa ka male contestant nga andam siya maghuwat ug padayon nga mangulitawo sa babaye nga kapares niya sa pag-audition sa maong show.
Nabantayan sa lain hurado nga si Vice Ganda nga kalit lang nakaluha si Angel ug mihirit kini og, “Luis, umiiyak si Angel!”
Na-conscious matud pa si Angel ug nitalikod gamay samtang padulong mudoul kaniya si Luis.
Pag-abot ni Luis, gipangutana niya si Angel og ,“Bakit ka naiyak?” Imbes nga motubag ,igo ra nitutok si Angel kang Luis.
Samtang sa premiere sa pelikulang Everything About Her niadtong January 26, mitambong si Luis ug nabantayan nga wala nagka-istorya ang duha.
Ang maong pelikula gibidahan nila ni Angel, Vilma Santos ug Xian Lim.
Pagkahuman sa premiere night, nilakaw dayon si Luis ug wala na motambong sa after party sa cast ug staff sa Everything About Her.
Daghan usab ang nakapangutana kung unsa ang pasabot ni Angel sa lenggua niya sa miaging gabii nga , "Always be there for the people who matter the most to you." Sa pagsuwat niining balitaa, wala pa mohatag og tubag ang duha ka kampo kalabot sa maong taho. (BANAT NEWS)