Edgar nasopresa sa resulta

CEBU, Philippines – Wala damha ni Edgar Allan Guzman ang init nga paghangop sa TV viewers sa tandem nila ni  Julia Montes sa seryeng  Doble Kara.  Suma pa ni Allan nga gibuhat gyud niya ang tanan aron maperpekto ang mga eksena nila ni Julia.

Arnel nag-sorry

Nangayo og pasaylo ang Journey vocalist nga si Arnel Pineda gumikan sa  “Pabebe Wave” nga iyang gibuhat  sa dihang  siya maoy hurado sa “Clash Of Celebrity” segment sa  It's Showtime niadtong Sabado. Gipasikat ang pabebe wave sa kaatbang sa It’s Showtime nga Eat Bulaga sa GMA-7. “Didnt mean to start something. I apologize, it was done with no malice at all,” tweet pa ni Arnel.

Apil si Pacman

Si Kongresista Manny Pacquiao maoy kauban ni Chavit Singson sa iyang plano nga mopalit og shares sa GMA Network. Mag-agi pa kini og lapad nga pagtoon.

Michael gisuwerte

Mapasalamaton ang singer nga si  Michael Pangilinan gumikan kay siya ang gikuha sa Star Cinema aron maoy  mokanta sa  “It Might Be You” nga  theme song sa  pelikulang “Everyday I Love You”. Sila si Liza Soberano ug Enrique Gil maoy mga bida sa maong movie project.

Ikaduhang hugna

Gipadayag ni Piolo Pascual nga bukas siya sa posibilidad nga ma-develop kang Shaina Magdayao. Kahinumduman nga midiskarte si Piolo kaniadto kang Shaina apan wala kini mosaler.

Buwag na

Gikatahong hagbay ra diay nga nagbuwag sila si Pops Fernandez ug iyang uyab nga negosyante. Mo-focus na lang karon si Pops sa pag-atiman sa iyang mga anak ug sa iyang negosyo.

Alang kang Duterte

Matud pa nga nibalik lang gyud dinhi sa Pilipinas si Robin Padilla aron motabang og kumbinser kang Davao City Mayor Rodrigo Duterte nga modagan pagka-presidente.  Gisaad ni Robin nga mangampanya gyud siya kang Duterte.

Jen todo trabaho

Tungod sa nagsagunson nga proyekto ni Jennylyn, nagkadaghan na usab ang properties sa aktres. Suma pa ni Jen nga nikugi gyud siya og samot sa showbiz alang sa kaugmaon sa iyang anak.

Denise nakapuntos ni Lea

Puwerting lipaya ni Denise Laurel gumikan gidayeg ni Lea Salonga ang iyang performance sa Your Face Sounds Familiar kung diin gisundog niya ang dagway sa singer.  Nasunod gyud ni Denise ang linihokan ni Lea.

Tinud-anay nga higala

Gibutyag ni Ai-Ai delas Alas nga usa si Piolo Pascual sa iyang  gikonsiderar nga tinud-anay niya  nga higala.  Giyagyag gyud kini sa komedyanteng aktres pinaagi sa iyang Instagram account.