Hugyawnatic

Dear Hugyaw,

Basta Lunes gani, ganahan kaayo kay makabasa napud ko og laing love story dinhi sa Banat News, apan niining higayona, ako na pud ang  mosuway og paambit sa istorya sa akong miaging lovelife.

Wala na ko'y uyab karon sulod na sa usa ka tuig, apan ako lang i-share ang kaagi nako sa katapusan nako nga na-uyab.

Ako diay si Reden, lalaki, 24 anyos ug nagtrabaho ko karon isip call center agent ug kontento ra ko karon sa kinabuhing single.

Dili ko mutuo sa panultihon sa ubang tawo nga kinahanglan nga duna'y uyab aron ka malipay. Daghan man gud nga ubang butang nga makapalipay sa atong kaugalingon.

Dugay nako nga naka-move on sa breakup namo sa akong ex-girlfriend nga si Lovely, 26 anyos nga usa pud ka call center agent.

Nagkaila mi ni Lovely kay schoolmate mi sauna sa high school diha sa Abellana National School, ug nagkauban na usab kaniadto sa mga laag.

Pag graduate sa high school, dugay-dugay na mi nga wala nagkakita pero okay raman kay wala man tu'y sparks niadtong higayona. Sa dihang nag-reunion among batch, nagkaabot mi og balik, ug nagpinangayoay dayon sa among mga contact number.

Sa among reunion party, didto ko nakabatyag sa iyang kaguwapa. Mahiligon ko og morena, mura gyud ko na-starstruck niya.    Wala ko kaagwanta, nangutana gyud ko, if naa nab a siya'y uyab, ug nitubag siya og "wala". Mura gyud ko og gibayaw, kay nagpasabot nga duna ko'y tsansa.

Wala dayon ko modiskarte dayon, kay abi pa lang na-inlove dayon ko niya, igo rako ni-appreciate sa iyang kaguwapa ug gusto nako nga mailhan nako og maayo ang iyang batasan nga maoy akong basehan kung modiskarte ba ko niya o dili.

Dili arte ug buotan kaayo si Lovely, busa samtang nagdagan ang panahon,  na-develop gyud ko niya .

Gasige na mi og date kay gusto man pud niya nga makaila siya nako og maayo.. Nanguyab gyud ko niya, ug dili ko makalimot kay didto ni nahitabo sa usa ka coffee shop diha sa IT Park. Giingnan ko niya nga maghuwat ko og two months kay diha daw siya modesisyon kung sugton ba ko niya o dili.

Pag-abot sa duha ka buwan, excited na ka'y ko sa among panagkita,  ug didto mi nag-date sa usa ka restaurant sa Ayala.

Grabe ang kakulba sa among panag-atubang ug wala gyud masayang akong paghuwat kay gisugot gyud ko niya.

Lipay kaayo ming duha, ug maayo ang dagan sa among relasyon sulod sa kapin sa duha ka tuig, apan naabot ang higayon nga kalit naman nihilaw ang iyang tinagdan nako.

Sa oras nga mag-uban mi sa pagpanuroy, akong mabantayan nga mura siya og wala'y gana kanako. Dako gyud og nausab sa iyang batasan ug dili gyud ko  kasabot kaniya hinungdan nga nagsagunson na ang among away.

Hangtud nga naabot ang panahon nga nihukom siya nga magbuwag mi kay napul-an na daw siya nako. Nakugang ko, kay wala gyud siya mohatag og klaro nga rason niini.

Ako siyang gipugos nga mosulti sa rason, ug didto siya nisulti nga  dugay na daw  nahupas ang iyang gugma kanako ug iyang giklaro nga wala siya'y laing nagustohan nga lalaki.

Gikapoy lang daw siya nako kay grabe ko kagipit niya kay dili ko mosugot nga molaag siya permi uban sa iyang barkada.

Nangayo ko og pasaylo sa akong mga kasaypanan apan tibuok na gyud ang iyang hukom, kay wala na daw siya'y gugma kanako. Wala ko'y mahimo. kutob na lang ko sa paghilak, kay useless man pud daw nga magbalik mi nga wala naman siya'y gugma kanako. Nagmahay ko sa akong gibuhat, maong naleksyon ko, kinahanglan   dili nako mo-gipit og babaye kung pananglitan makauyab ko og balik . Alang sa mga tawong dunay uyab  nga  nibasa niining akong love story, tambagan ta mo nga kinahanglan nga hatagan ninyo og higayon nga makalaag ang imong  uyab  uban sa iyang barkada, kay wala nagtuyok ang iyang kinabuhi diha kanimo, duna pu'y laing mga butang nga makapalipay kaniya.Mo-request lang ko sa lyrics sa by A Great Big World Ft. Christina Aguilera.

Hello Reden! Thank you so much sa imong LOVE STORY! Paabuta ugma puhon ang imong request

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

Corner V. Gullas and D. Jakosalem Streets Barangay Sto. Nino 6000 Cebu City, Philippines