Maja ug Enrique gikagubtan og balik

CEBU, Philippines – Nag-viral sa social media ang video sa  sexy dance number nila ni Maja Salvador ug Enrique Gil sa programang  ASAP kagahapon.

Mikiay-kiay  ang duha  sa entablado sa Alonte Sports Arena sa  Biñan, Laguna pinaagi sa pagsayaw nila og  "Hit The Quan," nga nakadawat og daghang  pagdayeg gikan  sa viewers.

Nagkadaiya ang mga  komento sa netizens kung diin ang uban niini nilenggua nga kusog gyud ang chemistry nila ni Maja ug Enrique sa dance floor . Aduna pud sila'y  fans nga nisugyot  nga kinahanglan nga mag-dance concert ang duha.

Si Maja maoy giila sa showbiz nga  "Dance Princess" samtang si Enrique gitawag og  "King of the Gil" gumikan sa talagsaon niya nga dance moves.

Kahinumduman nga gikagubtan usab kaniadto ang dance number nila sa ASAP sa dihang nisayaw sila og  Twerk It Like Miley.

Heneral Luna naka-P200M na!

Malipayong gibutyag sa executive producer  sa Heneral Luna nga si Fernando Ortigas nga mikita   na og kapin sa P200M ang maong pelikula.

Dako ang iyang pasalamat  ngadto sa  mga tawo nga  nisuporta niini  nga nitabang usab pag-awhag ngadto sa ubang tawo nga motan-aw  sa maong pelikula.

Ang maong pelikula gibidahan ni John Arcilla ug giingong dako kaayo og natabang ang mga  positibong testimonya  nga gipang-post sa social media.

Sukad nga nag-pista ang netizens sa pagdayeg sa Heneral Luna,  gikagubtan dayon kini sa mga tawo hinungdan ubay-ubay ka mga sinehan ang nagpasalida niini.

Aduna pa'y mga sinehan nga nagpasalida sa Heneral Luna  ug nitungtong na kini sa kapin sa usa ka buwan sa white screen .  

Glaiza mikatawa lang sa “Tomboy issue”

Todo katawa si  Glaiza de Castro sa wala pa nahupas nga isyu nga matud pa usa siya ka tomboy.

Nakaingon ang aktres nga epektibo gyud diay ang pagdala niya isip tomboy sa serye niya kaniadto sa GMA-7 nga The Richman's Daughter gumikan kay nadudahan naman hinoun siya nga tomboy  sa luyo sa kamera.

Suma pa ni Glaiza nga igo ra siya mokatawa sa maong tsismis gumikan kay dili man kini tinoud ug siya maoy nakaila og maayo sa iyang kaugalingon.