Hugyawnatic

Dear Banat News Hugyaw,

Ako diay si Christian, 26 anyos ug taga Barangay San Nicolas, Cebu City. Nagtrabaho ko karon sa usa ka restaurant diha sa Talamban.

Usa ka tuig kapin na mi sa akong uyab nga  si Jess , pareha ra mi og edad  ug nagtrabaho siya karon isip sales lady sa usa ka cell shop sa Ayala.

Kalit lang nasulod sa akong huna-huna nga ako i-share ang among love story kay permi man ko tigbasa og Banat News ug kanunay na gyud ko mag-atang sa LOVE STORY matag Lunes.

Gihigugma nako si Jess busa wala gyud ko magpadala sa mga dautang ipanulti sa ubang mga tawo kalabot sa among relasyon.

Sa tinuod lang, nagkaila mi sa akong uyab sa usa ka bar diha dapit sa Mango. Duna'y mga higayon nga nanglaag mi sa akong barkada sa usa ka bikini bar kay gusto mi malingaw.

Kalit ra man tu nasulod sa hunahuna sa akong barkada  nga manglaag mi og bikini bar kay puros mi nakuryoso kung unsay sulod anang lugara.

Pagsulod pa lang namo, nagbaha ang mga lalaki nga dunay kapares nga mga babaye sa ilang table.

Medyo kulbaan mi gamay kay kadto pa mi kasuway og bikini bar,   ug gipahimutang dayon mi sa waiter sa usa ka table nga atubangan kaayo sa stage.

Nalingaw ra pud among grupo sa pagtan-aw og mga sexy nga babaye nga nagsayawsayaw sa stage.

Samtang nanan-aw mi sa show, niduol ang waiter namo ug nangutana kung duna ba kuno mi gustong makauban sa table. Kay inigkahuman kuno og sayaw sa dancers, puwede ra daw sila makauban sa table.

Kay upat man mi kabuok, upat pud ka girl ang among gipili, ug gituparan gyud mi sa among gilingkoran.

Ang girl nga nitupad nako mao si Jess, nag-istoryanay mi og maayo. Ug sa sige nako og tutok kaniya,  nabantayan gyud nako ang iyang kaguwapa.

Pareho sila og nawong ni  Michelle Madrigal , ug sa tinuod lang ,  dali ra kay ko ma-attract  og morena.

Nangayo ko og number niya, pero pag-una kay dili siya mohatag apan ako gyud siya napugos .Ana siya, kung dili pa lang daw ko cute, dili gyud siya mohatag sa iyang number. Hahaha, naulaw ko sa iyang gisulti.

Nagteksanay ming duha, nagkasinabot nga mag-date hangtud nga nagkauyab gyud mi.   Sa unang semana sa among relasyon,  ako na siya nga gitambagan nga moundang na siya sa iyang trabaho. Pag-una napugos ra gyud siya sa pagtrabaho sa bar aron maka-support siya sa iyang family.

Apan ako siyang gipasabot  nga puwede pa siya makapangita og laing trabaho ilabi na nga nakakuha siya og pila ka units sauna sa college.

Nisugot siya sa akong sugyot maong nitrabaho gyud siya og cell shop diha sa Ayala . Duna'y mga higala namo nga kahibalo sa iyang karaang trabaho apan baliwala ra ko sa mga istorya ug ang importante nga  uyab nako si Jess nga maoy akong inspirasyon  sa matag adlaw nako nga gimbuhaton.

Dili ko manumbaling sa iyang kagahapon , kay nahigugma man ko niya, so ako gyud  nga barugan ang among relasyon. Mo-request lang ko sa lyrics sa No Matter What by Boyzone. Daghang salamat Banat News Hugyaw , God bless.

Hi Christian! Thank you so much sa imong LOVE STORY! Paabuta ugma puhon ang imong request.

Dear HUGYAWnatics, aduna ba kamo'y LOVE STORY? Suwata ka na ug ipadala pinaagi sa pag-like sa atong bag-ong Facebook Page: Banat News Hugyaw (BNH). I-like ang atong page daan, unya i-private message ang imong LOVE STORY. Ayaw lang i-abbreviate  aron matarong og basa.

Mahimo sab nga pinaagi sa snail mail. Ang atong address mao kini:

Love Story

C/o Banat News

V. Gullas St. corner D. Jakosalem St.

Barangay Sto. Nino

6000 Cebu City, Philippines