Two Wives

CEBU, Philippines – Magpares sila si Jason Abalos ug Kaye Abad sa umaabot nga serye sa ABS-CBN, ang Pinoy version sa koreanovela nga Two Wives. Naghinam-hinam na ang duha niini gumikan kay una kining higayon nga magkapares sila sa usa ka proyekto.

Aga miatras sa kaso

Giatras ni Aga Muhlach ang iyang protesta ngadto sa nakaatbang niya sa politika niadtong 2013 nga si Camarines Sur Rep. Felix William "Wimpy" Fuentebella. Gipadayag usab sa aktor nga dili na siya interesado nga mosalmot pa sa eleksyon karong 2016.

Philip sa HSH

Molugwa si Phillip Salvador sa sitcom sa ABS-CBN nga Home Sweetie Home. Modala siya isip amahan ni Toni Gonzaga nga nitrabaho sa laing nasud.

Paolo magpabilin sa TV5

Gipadayag sa manager ni Paolo Bediones nga si Noel Ferrer nga malantawan gihapon ang iyang alaga sa TV5. Suma pa niya nga mag-istoryahanay sila si Paolo ug ang TV5 President nga si Noel Lorenzana aron hisgutan ang sunod niya nga assignment sa maong network.

Pawala sa stress

Tsika pa ni Glydel Mercado nga ang pagduwa og golf maoy naandan na niya nga buhaton kung ganahan siya mawala ang iyang stress. Suma pa sa aktres nga gaan kaayo ang pamati kung moduwa og golf.

Sweet gihapon

Giangkon ni Jomari Yllana nga sweet gihapon sila sa kanhi niya asawa nga si Aiko Melendez apan dinhi ra sila kutob. Suma pa sa aktor nga bisan naputol na ang relasyon nila ni Aiko, dili gyud nila kalimtan ang responsibilidad nila sa ilang mga anak.

Nagpabugnaw

Temporaryong dili malantawan sila si Billy Crawford ug Coleen Garcia sa programang It's Showtime sa ABS-CBN. Nagpabugnaw una si Billy human kini nakasugat og dakong isyu niining bag-o lamang diin nanghagis siya sa presinto sa kapolisan nga niresulta sa iyang pagkapriso. Nakapyansa na ang TV host ug gusto lang niini nga mo-relax ug todo suporta kaniya ang uyab niya nga si Coleen.

Janella giatrasan

Giingong daghan ang gusto nga modiskarte kang Janella Salvador apan nangatras kini human nipadayag ang aktres nga dili pa siya andam mosulod og relasyon.  Nabatyagan ang kaanyag ni Janella sa seryeng Be Careful With My Heart.

Kanus-a kaha?

Wala pa'y ideya si Jane Oineza kung kanus-a niya sugton si Jeron Teng. Malipayon hinuon si Jane sa istado nila karon isip maghigala sanglit tipik man kini sa pag-ilhanay nila sa usag-usa.

Kalamboan sa career

Tsika pa ni Daniel Matsunaga nga dako gyud ang kabag-ohan sa iyang career sukad siya nakadaug sa Pinoy Big Brother All-In.  Nadugangan ang mga product endorsement sa Japanese-Brazilian model.

Fanny nag-sorry kang Kiray!

Gidayeg sa mga netizen ang banggiitan ug sikat nga make-up artist nga si Fanny Serano gumikan sa pagka-mapaubsanon niini dihang nangayo siya og pasaylo ngadto kang Kiray Celis nga nalakip sa "worst dressed" sa nilabay nga Star Magic Ball.

Nagpasalamat usab siya sa www.fashionpulis.com gumikan kay ang pagkalakip matud pa ni Kiray sa worst dressed nagdasig kaniya aron paningkamutan nga mamahimo siyang maayo nga designer.

Nag-sorry si Fanny kang Kiray gumikan kay sa nilabay nga tuig, nalakip si Kiray sa worst dressed sa maong ball, hinungdan nga nangita siya og pamaagi nga mahimamat kini sa personal, aron iyang mapailawom og makeover, sa ingon mamatud-an niya nga adunay gitagong kaanyag ang nahisgutang komedyana.

Karong tuiga, naglampuson matud pa sila sa ilang tahas nga ikapakita ang kaanyag ni Kiray, base usab sa dul-an 10k likes nga nadawat sa hulagway sa komedyana nga napatik sa nagkadaiyang social media sites. Apan nalakip lang gihapon si Kiray sa worst dressed busa maningkamot matud pa sila og maayo sunod tuig.

May mga netizen nga niingon nga ang ka mapaubsanon ni Fanny mao gayud ang sekreto nganong nagmalungtaron siya sa industriya.

Kristel  nag-sorry sab!

Nitingog sab si Kristel Moreno nga labihan usab ang nadawat nga pagsaway gumikan sa iyang katambok diin dili matud pa siya maayong tan-awon atol sa  8th Star Magic Ball niadtong Sabado sa gabii.

Nangayo og pasaylo si Kristel kay nahago pa gayud matud pa ang mga himantayon paghimo og facebook page aron lang gayud isagpa ngadto kaniya ang kamatuoran nga maot siyang tan-awon.

Nag-sorry usab siya kay naugtas matud pa ang uban nga kon makapanaway mura sab gyud ug kinsang mga gwapaha og sexyha.

Pero wala siya mag-sorry nga tambok siya gumikan kay niya pa, sa mata sa Ginoo, perfect matud pa siya.