Ug mibaha ang luha

Serious gihapon ko ron, sorry. Tungod kini sa usa ka higala nga mitaliwan niadtong Martes sa hapon. Niadtong adlawa usab nga migawas dinhi sa KRISTALS ang akong panghinaot nga dili na palabihan ang pag-antos sa banay ni Abay Marlon. Sa pagka Domingo pa lang, pagsimba nako sa St. Floriane chapel, wa nako damha nga ako gihapo’y makasilibi sa misa. Nanghinaot lang ko ni Lord, ug ni San Pedro Calungsod, nga dili na dugayon ang kalisdanan sa banay ni Abay Marlon Bellita. Wa pod nako damha, nga ang momisa mao diay si Rev. Fr. Charles Jayme. Katapusan niyang misa, sa wa pa siya mopaingon sa Roma aron pagdala sa official image ni San Perdro Calungsod, sa labing unang higayon ako ang nakasilbi sa iyang misa. Pagka Martes migawas ang akong lindog. Mga panghinaot nga dili dugayon ang pag-antos ni Abay Marlon ug sa iyang banay. Pagka hapon, sa akong pag-ampo, sa pag-abot nako sa bahin diin, nangaliya na ko ni San Pedro Calungsod, nga naghangyo nga tabangan ko Niya paghangyo ni Lord nga dili na paantoson si Abay Marlon ug iyang banay, nadugay ko. Hugot kaayo ang akong pag-ampo, uban sa pagtubod sa mga luha. Wa ko magdahom, nga gihimo na pod diay ni San Pedro Calungsod ang akong mga pangaliya, ug gitugotan na ni Lord si Abay Marlon nga magmalipayon siya uban Niya kalipay nga wa nay katapusan. Magmahay tingali nako ang banay ni Abay Marlon karon. Mohilak sila sulod sa usa ka buwan O tuig hangtod nga, pakit-on sila sa senyales, nga dili sila angayang magsubo, kay nakapahuway na si Abay Marlon ug malipayong magpaabot nato kun kanus-a kita moapas niya. Mga pahasubo usab ngadto sa banay ni Abay Angeles Diez. Ninyong duha, Salamat Sa Inyong Pagpakatawa Namo Ug Paabota Mi.

“BINISAYA sa Manila”

Ang mga Cebuano filmmakers mopasundayag sa ilang mga works of art didto sa kaulohan karon Dec. 1 hangtud 9.

Ang maong kalihukan giulohan og “BINISAYA sa Manila” diin ipahigayon ang screening sa mga pelikula sa lain-lain nga venue.  Sa katapusang adlaw, ang pelikula nga “Kordero sa Dios” ang featured film nga pagahimuon sa Fullybooked U-view sa Bonifacio Hi-street sa Taguig.

Ang Kordero sa Dios istorya sa usa ka bata nga nasuko sa Ginoo apan nibalik sa iyang sabakan sa panahon sa kamatayon nga maoy nagsilbing agianan ngadto sa kagawasan sa sakit ug pag-antus nga iyang naagian.

Usa usab sa mga featured film sa maong kalihukan ang Biyernes Biyernes diin pito ka mga filmmakers sa Sugbo ang nagkahiusa aron mamugna ang maong pelikula. 

Sila mao si Norbert Elnar, Idden de los Reyes, Donna Gimeno, Bambi Beltran, Keith Deligero, Christian Linaban ug ang multi-awarded director nga si Remton Siega Zuasola.

Ang Biyernes Biyernes nagpakita sa lain-lain nga hitabo sa dakbayan sa Sugbo sulod sa 24 ka oras sa adlaw’ng Biyernes.

Napakita na kini sa usa ka film festival sa Bacolod ug Davao ug didto usab sa San Francisco, California.

Na-feature usab ang Biyernes Biyernes sa BBC niadtong 2010.

Kini ang kumpleto nga listahan sa mga independent films nga ipasalida sa Manila - Biyernes Biyernes; Ngilngig Stories; Ang Gugma ni Olivia; Uwan Init Pista sa Langit; Saranghae My Tutor; Ang Katapusang Bagting; Peace Valley; Way To The Sunset; Yawyaw; Kordero sa Dios.