Aso na nawawala, gumamit ng doorbell nang makabalik sa bahay noong Pasko!

Isang ‘Christmas miracle’ ang nangyari sa isang pamilya sa Florida, U.S.A. nang si Athena, isang 4-taong gulang na German Shepherd-Husky mix, ay nakabalik at gumamit ng doorbell upang ipaalam ang kanyang pag-uwi matapos mawala ng siyam na araw.

Nawala si Athena mula sa kanilang tahanan sa Green Cove Springs noong Disyembre 15.

Sa kabila ng walang tigil na paghahanap ng pamilya at mga kapitbahay, hindi nila matagpuan ang aso.

Ngunit pagsapit ng 2:30 ng madaling araw ng bisperas ng Pasko, nagulat ang may-ari na si Brooke Comer nang marinig ang doorbell.

Nang tingnan niya ang kanilang Ring camera, nakita niyang si Athena iyon at pinipindot ang doorbell.

Naging emosyonal ang kanilang pagkikita. Yumakap si Athena sa kanyang mga amo. Pagkatapos ay masaya itong naglaro ng paborito niyang bola.

Upang maiwasan ang ganitong pangyayari sa hinaharap, ipapa-microchip na siya ng kanyang mga may-ari.