Harley Davidson Batch 2012, Core+ Batch 2018 nanoktok sa finals

CEBU, Philippines — Ang Harley Davidson Batch 2012 ug Core+ Batch 2018 mipayaka sa ilang mga karibal aron pagtikang ngadto sa usa na lang ka daog gikan sa pagbalik sa division finals sa Sacred Heart Ateneo Alumni Basketball Athletic Association (SHAABAA) Season 29 niadtong Domingo, Hunyo 28, didto sa Sacred Heart School-Ateneo de Cebu (SHS-AdC) Magis Eagles Arena sa Barangay Canduman, dakbayan sa Mandaue.

Si Adven Jess Diputado mipupo og 26 puntos, 14 ka assists ug pito ka rebounds samtang si Dave Wilson Yu midugang og 22 puntos, pito ka rebounds, ug unom ka six assists sa dihang ang Division B defending champion Batch 2012 mipakaging sa Nest Workspaces Batch 2013, 93-82, sa pasiunang duwa sa ilang best-of- three semifinals series.

Mihimo sab og kasikas si Julius Cadavis uban ang double-double nga 19 puntos ug 14 ka rebounds alang sa Batch 2012.

Sa laing sangka sa semis, si Gabe Branzuela mipabuto og 37 puntos uban ang unom ka rebounds, siyam ka assists, pito ka steals ug duha ka blocks sa dihang gibugha sa Hatch IT Solutions Batch 2010 ang '04 The Win Batch 2004, 92-81, aron pagpaduol sa kampiyonato.

Si Branzuela nakakuha og dakong suporta gikan ni Jasper Diaz uban ang 21 puntos, 19 ka rebounds, upat ka assists, usa ka steal, ug duha ka blocks, samtang sila si Dell Tan ug Charles Divinagracia nagkumboya'g 28 puntos alang sa Batch 2010.

Sa Division C, ang defending champion Batch 2018 mipalig-on sa ilang kampanya nga madepensaa ang ilang korona human gilampornas ang FADI Batch 2021, 86-68.

Si Franz Ray Diaz maoy nangu sa upat ka Batch 2018 players nga mikadlit og double figures uban ang 18 puntos, walo ka rebounds, ug tulo ka assists.

Sila si Patrick Wilson Yu ug Benedict Andre Chua parehong miposte og double-double, samtang si Christian Manaytay miamot og 13 puntos, lima ka rebounds, ug tulo ka assists alang sa Batch 2018. Si Yu mikolekta og 15 puntos, 12 ka rebounds, lima ka assists ug duha ka steals samtang si Chua mitalio og 13 puntos ug 13 sab ka rebounds uban ang upat ka assists ug tulo ka steals.

Sa laing resulta, si Anton Chua miharos og 24 puntos, lima ka rebounds, lima ka assists, ug lima ka steals sa dihang giunhan sa BRX Batch 2015 ang Batch 2014, 86-72, sa kaugalingon nilang serye.

Nanghugyaw sab si Chaz Cokaliong uban ang 17 puntos, duha ka rebounds, usa ka assist, ug usa ka steal. Sila si Janjan Jaboneta ug Nino Araw-araw parehong mipugnit og 16 puntos gawas nga nagkumbinar og 14 ka rebounds, siyam ka assists ug lima ka steals alang sa Batch 2015.