Trahedya sa boksing
CEBU, Philippines — Duha ka Hapon nga boksidor nangamatay tungod sa head injury
Makapakurat nga trahedya ang mitay-og sa kalibutan sa boksing didto sa Japan sa dihang duha gyud ka mga boksidor ang nangamatay gumikan sa injury sa ulo nga ilang nahiaguman atol sa tagsa-tagsa nila ka away sa usa ka promosyon sa miaging semana.
Sila si super featherweight Shigetoshi Kotari ug lightweight Hiromasa Urakawa, parehong 28 anyos, miaway sa susamang card didto sa Korakuen Hall sa Tokyo niadtong Agosto 2.
Pareho silang dali nga gidala sa ospital diin gioperahan ang ilang utok.
Si Kotari, nga nagtabla ug ang kababayan niyang si Yamato Hata human sa 12 ka hugna nilang kumbati, nakabsan gyud sa iyang kinabuhi niadtong Biyernes sa gabii, Agosto 8.
Samtang si Urakawa, nga gipalukapa sa ikawalo ug katapusang hugna ni Yoji Saito, wala sab makalahutay ug mipanaw niadtong Sabado, Agosto 9.
Ang World Boxing Organization (WBO) mi-anunsiyo ning sa subo nga balita pinaagi sa Instagram kagahapong adlawa (Domingo, Agosto 10).
"This heartbreaking news comes just days after the passing of Shigetoshi Kotari, who died from injuries suffered in his fight on the same card," dason pa sa WBO dayong padayag sa ilang pahasubo ngadto sa pamilya, mga higala ug sa komunidad sa boksing sa Japan. Si Tsuyoshi Yasukochi, ang secretary-general sa Japan Boxing Commission, nagkanayon nga lagmit mao kini ang labing unang higayon sa kasaysayan ilang nasud nga nakalas ang kinabuhi sa duha ka mga boksidor sa susamang event.
- Latest
