EGS-Solid North naghari sa 1st Mayor Garcia Cup
CEBU, Philippines — Ang EGS-Solid North nagsandig sa pagkamabayanihon nilang Mark Yee ug Marwyn Taywan aron piogon ang RKF Iloilo, 71-67, ug langkayon ang kampiyonato sa 1st Mayor Raymond Alvin Garcia Cup Invitational Basketball Tournament 2025 niadtong Biyernes sa gabii, Enero 31, didto sa Cebu City Sports Institute (CCSI) Gym sa Barangay Sawang Calero.
Abante ang RKF Iloilo og tres puntos, 64-61, sa pinal nga kuwatro minutos apan sila si Yee ug Taywan mibomba og duha ka sagunson nga 3-pointers aron paghatag sa EGS og 69-67 nga labaw.
Si Cedrick Manzano sa RKF duna untay higayon nga tablahon ang iskor ug posibleng makapuwersa og overtime apan nasipyat sa krusyal kaayo niyang layup.
Sa hilimatyong segundos, si Yee gi-foul sa RKF ug dayon kalmadong mipasud sa duha niya ka free throws sa nahibilin nga 6.7 segundos sa duwa aron silyohan ang kulbahinam nga daog sa EGS.
Si Yee maoy nangu sa EGS uban ang double-double nga 14 puntos ug 12 ka rebounds.
Si Kaisus Small-Mastin midonar og 12 puntos samtang sila si Taywan ug Encho Serrano nagkumboya'g 19 puntos, lima ka rebounds ug walo ka assists alang sa EGS, nga mibulsa og P300,000 sa pagdominar nila sa usa ka semanang torneyo.
Sa laing bahin, ang Team Khalifa sa Tacloban City mipayaka sa Fiesta Gas sa San Carlos City, 89-77, aron pagpahiluna sa ikatulong dapit.
Si Jancork Cabahug miposa og unom ka tres sa iyang 23 puntos, si Elmer Echavez mitali og 21 samtang sila si Joel Lee Yu ug Mark Llemit miamot og 11 puntos matag usa alang sa Khalifa ni Atty. Francis Tolibas nga mikabi og P100,000.
- Latest
