Don Bosco Greywolves mikulit og four-peat sa CESAFI football

CEBU, Philippines — Ang Don Bosco Technical College (DBTC)-Cebu Greywolves midominar sa Sacred Heart School-Ateneo de Cebu (SHS-AdC) Magis Eagles, 3-1, sa ilang sangka sa finals aron pagkumpleto og rekord nga four-peat sa high school division sa Cebu Schools Athletic Foundation, Inc. (CESAFI) Season 24  football tournament niadtong Domingo, Disyembre 1, didto sa Cebu City Sports Center.

Si Mark Anthony Talingting Jr. mikuha dayon og atensiyon alang sa mga Bosconians human milansang sa unang goal sa nakaon nga kuwatro minutos sa pa lamang sa duwa.

Paglabay sa 16 ka minuto, si Razi Gabrielle Baguio na sab maoy naka-iskor sa wala pa si Ziehron Ezekielle Lao mihatag sa Greywolves og lisud nang apson nga labaw, 3-0, sa ika-48 nga minuto dayon na ngadto sa paglangkat sa ikaupat nilang sagunson nga kampiyonato.

Si Marco Angelo Ouano naka-goal sa ika-78 nga minuto aron paglikay sa Magis Eagles nga maserohan. Midugang og lamas sa bulawanon nilang kalamposan, ang Bosconians milangkat og tulo ka individual awards nga gipangulohan ni John Lexter Conde nga maoy gikoronahang Most Valuable Player (MVP) ug Best Midfielder. Ang teammate niyang si Glenndale Jesus Bontuyan gibayaw nga Best Goalkeeper.

Miangkon sa laing duha ka pasidungog sila si Jared Willy Almendras (Top Scorer) ug James Lowell Comon (Best Defender) sa SHS-Ateneo.

Ubos sa pagtimon ni legendary coach Tomasito Glenn Ramos inabagan nilang Jon Rena, Tomtom Ramos, Glenn Cariquetan ug Archieval Comendador, ang ubang mga miyembro sa DBTC-Cebu four-peat champion naglangkob nilang Deric Andre ug Ryko Zedric Abella, Ray Agustine Abuzo, Earl Rey Amistad II, Fritz Marco Amazona, Rayne Asher Amora, Kurt Justine Barro, Yuki John Ceniza, Aldric Joaquin Cepe, Czar Robert Daanoy, Keanne Rudvince Dolloso, Renzo Angelo Enriquez, Jayzon Mikel Genson, Chrysler Luke Jubac, Raffael Isaac Kierulf, Jose Luis Llerin, Allister Louis Manlosa, Edgar Paredes IV, Joseph Roy Requiron ug Nolasco Dave Tan III.  

"Do not rest on your laurels. Continue training, keep on practicing and honing your skills. Be grateful and humble in victory because you'll not be on top all the time," matud pa ni DBTC-Cebu President Rev. Fr. Randy Figuracion, SDB.