CEBU, Philippines — Si Trae Young mikuha og atensiyon uban ang 20 puntos ug career-high 22 ka assists sa dihang gibihag sa Atlanta Hawks ang Cleveland Cavaliers, 135-124, sa NBA kagahapon didto sa Rocket Mortgage FieldHouse sa Cleveland, Ohio.
Dako sab og naambag si De'Andre Hunter nga mikadlit og 26 puntos ingon man si Jalen Johnson nga mikadlit og 22 puntos sa dihang gipatilaw sa Hawks ang Cavs sa una niining pilde didto sa ilang korte ning season.
Ang layo kaayong tres ni Young sa pinal nga 1:43 sa duwa nakapaginhawa og lawom sa Hawks uban ang 129-122 nga labaw.
Si Johnson nagkanayon nga ang mga assists ni Young krusyal sa makapakurat nilang pagdagit sa Cavs.
"He was really getting off the ball and finding everyone...a lot of people don't necessarily talk about him even though he's leading the league in assists, but they don't talk about him as the playmaker," matud pa ni Johnson.
Ang Hawks nagkupot na karon og 8-11 rekord apan ang labing mahinungdanon alang ni Young mao nga ilang napakita kon unsay puyde nilang mabuhat.
"They are a really good team who have been playing well all year and I feel we have been a little inconsistent but the times that we have played well, we've played really well," dason pa ni Young.
Si Donovan Mitchell mipabuto og 30 puntos samtang si Evan Mobley mipupo og 22 puntos ug 13 ka rebounds apan pareho silang naminghoy kay ang Cavs natagak sa 18-2.
Sa laing aksiyon, si Alperen Sengun mitali og 11 sa iyang 22 puntos sa overtime aron pangulohan ang Houston Rockets ngadto sa 122-115 nga pagpakaging sa nagkagidlay nga Philadelphia 76ers.
Si Sengun milangkat sab og 14 ka rebounds ug mipasa og pito ka assists alang sa Rockets nga miinat sa ilang baraha ngadto sa 14-6.
Wala sab magpabitin si James Harden nga mipabuagay og 43 puntos sa dihang gilampaso sa Los Angeles Clippers ang Washington Wizards, 121-96.
Si Harden mi-iskor og 23 puntos sa unang kuwarter pa lamang ug mibiya na sa duwa sa naghinapos nga bahin sa ikatulong kuwarter sa dihang ang Wizards gikondena na sa ika-13 nilang sagunson nga pilde.
Sa laing resulta, si Tyler Herro mikolekta og 27 puntos samtang si Duncan Robinson milansang og unom ka 3-pointers sa dihang gibugha sa Miami Heat ang Charlotte Hornets 98-94.
Mihimo sab og kasikas si Bam Adebayo bitbit ang 10 ka rebounds ug 10 ka assists alang sa Heat. (BANAT NEWS)