CEBU, Philippines — Ang Benedicto College (BC) Cheetahs mipayaka sa University of San Jose-Recoletos (USJ-R) Jaguars, 70-63, aron pag-angkon og puwesto sa Final Four sa Cebu Schools Athletic Foundation, Inc. (CESAFI) Season 24 men's basketball tournament niadtong Martes sa gabii, Nobiembre 12, didto sa Cebu Coliseum.
Nagbarog sa ikatulong dapit sa college division standings uban ang 5-1 win-loss record, ang Cheetahs ni coach BJ Murillo garantisado na og luna sa semifinals bisan pa man og unsay resulta sa katapusan nilang duha ka duwa batok sa way pildengUniversity of Cebu (UC) Webmasters ug Cebu Institute of Technology-University (CIT-U) Wildcats sunod semana.
Si Denrick Orgong maoy nangu sa Cheetahs pagpakurat sa Jaguars bitbit ang 21 puntos, walo ka rebounds, usa ka assist, usa ka steal ug usa ka block.
Miamot si Albert Joshua Tolipas og 16 puntos, upat ka rebounds, unom ka assists ug duha ka steals samtang si Junil Bulan midugang og 12 puntos, unom ka rebounds ug duha ka assists alang sa Cheetahs, nga milusad og nagkayong 20-10 rally sa ikaduhang kuwarter aron inaton ang usa ka lugas nilang bentaha ngadto na sa double-digit, 35-24, sa halftime.
Ang Cheetahs wala na molingi pa sukad niadto ug miinat pa gani sa ilang labaw ngadto sa 14 puntos, 66-52, sa pinal nga singko minutos sa aksiyon.
Sila si Elmer Echavez ug Jay Dieparine mihipos og 13 puntos matag usa alang sa Jaguars, nga mihuman sa ilang kampanya sa eliminasyon uban ang tablang 4-4 nga baraha ug nameligro pang matagak sa semis depende sa kon unsay resulta sa nahibiling tulo ka duwa sa CIT-U.
Sa high school, ang University of San Carlos (USC) Baby Warriors nakasagunson og duha ka daog human gibuntog ang Cebu Roosevelt Memorial Colleges (CRMC) Baby Mustangs, 68-63.
Si Xian Garcia mipabuto og 23 punto ug walo ka rebounds, si Neil Ibarita mitali og 10 puntos, upat ka rebounds, usa ka assist ug duha ka steals samtang si Brad Miguel Yu hapit morehistro og triple-double uban ang otso puntos, 11 ka rebounds, walo ka assists ug upat ka steals sa dihang ang Baby Warriors misaka sa ilang marka ngadto sa 2-7 padung sa katapusan nilang duha ka duwa ning season.
Si Karl John Agravante mikadlit og 15 puntos, walo ka rebounds ug unom ka steals, samtang sila si Erick Estalani ug Leonil Caguete nagkumbinar og 23 puntos, 11 ka rebounds, tulo ka assists ug duha ka steals alang sa Baby Mustangs, nga nakatilaw sa ikawalo nilang pilde nga giatbangan og nag-inusarang daog.