CEBU, Philippines — Ang mga pambato sa Lamac mipakita og igong kadasig taliwala sa presyur aron piogon ang Jugan sud sa overtime, 89-88, sa makapaisa'g balahibo nga tinagakay nga duwa sa ilang best-of-three finals aron langkaton ang korona sa midget division sa 14th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Human nagtabla, 82-82, sa regulasyon, ang duha ka kampo hugtanon na sab nga nagpinaksitay sa dugang singko minutos sa makutas aksiyon hinungdan nga ang mga nanan-aw nalingaw og maayo ug nagpaabot sa pinal nga resulta uban ang tumang kahinam ug kakulba sa ilang dughan.
Sa dihang mitin-aw na ang aso, ang Lamac ni coach Edsel Vallena maoy milugwa nga madaogon pinaagi sa usa lamang ka lugas.
Sila si Cliff Raven Presbitero ug Kent Bryan Mendoza ang mga bayani sa Lamac human sila nagkumboya'g 44 puntos. Nakakuha sila og dakong suporta gikan ni Kerwin Pacaldo nga miamot og 18 puntos.
Si Johh Jeffrey Broa mipabuto og 26 puntos alang sa Jugan, samtang sila si Gem Roxas Dabalos ug Brian Catandejan mi-iskor og 16 puntos matag usa sa pilderong kawsa.
Sa laing bahin, giunhan sa Pulpogan ang Nangka, 103-88, sa kaugalingon nilang serye alang sa kampiyonato sa senior category.
Si Chris Perolino maoy nangu sa Pulpogan uban ang 23 puntos. Sila si Rexon Moneva ug JC Escalona mikadlit og 17 ug 15 puntos sa dihang mitikang sila ngadto sa usa na lang ka duwa aron sakmiton ang gihandum nilang titulo.