CEBU, Philippines — Si LeBron James ug ang kamaguwangan niyang anak nga si Bronny James misuwat og kasaysayan sa NBA human sila naka-uban sud sa korte sul-ot ang uniporme sa Los Angeles Lakers kagahapong adlawa.
Ang mag-amahan dungan nga miduwa pagsugod sa ikaduhang kuwarter atol sa pre-season game sa Lakers batok sa Phoenix Suns didto sa Palm Desert, sidlakang bahin sa LA.
Ang ilang panagkuyog giatngan sa kadaghanan sukad ang Lakers mikuha ni Bronny nga 55th pick sa 2024 NBA Draft niadtong Hunyo. Ang bag-ong head coach sa Lakers nga si J.J. Redick niadto pang miaging bulan namahayag nga sila si James ug Bronny maka-uban gyud duwa ug siya mismo daw dili pa makatoo nga kini nahitabo na gyud.
Sa maong duwa, si Redick mipa-ilaila ni Bronny James sa korte sa dihang ang Lakers naglabaw og nuybe puntos, 34-25.
Sa sayo pa si LeBron mipadayag nga ang pagduwa uban ni Bronny sa susamang team nakahatag kaniya og dugang kadasig ug motibasyon sa pagsud niya sa ika-22 nga season sa mabulokon niyang karera.
Gipaabot hinoon si Bronny nga moduwa sa iyang rookie season sa NBA G-League inay sa senior team sa Lakers sa umaabot nga season.