CEBU, Philippines — Ang Pulpogan ug Lamac miangkon og luna sa kampiyonayo sa tagsa-tagsa nila ka dibisyon sa 14th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Sa seniors level, ang Pulpogan mipalayas sa defending champion Lamac sa ilang trono pinaagi sa 101-79 nga demolisyon.Si Rexon Moneva mipabuto og 31 puntos, samtang si James Saliot ug Cris Perolino nagkumbinar og 26 puntos alang sa Pulpogan, nga makigharong batok sa Nangka o Jugan sa finals.
Ang laing pambato sa Pulpogan mipalagpot sa Pitogo, 68-44, aron pagplastada og best-of-three title series batok sa Cabangahan sa SK category. Si Patrick Damayo maoy nangu sa Pulpogan bitbit ang 22 puntos samtang si CJ Mission midugang og 11 puntos. Sa midget class, ang Lamac mitagak sa Pulpogan, 89-82, aron pagmartsa ngadto sa finals. Si Kent Bryan Mendoza mipabuhagay og 26 puntos alang sa Lamac. Nakakuha siya og igong suporta gikan nilang Cliff Raven Presbitero ug Kerwin Pacaldo nga mikadlit og 16 puntos matag usa alang sa Lamac, nga makigharong sunod sa Jugan alang sa korona sa midget.
Sa laing bahin, ang Casili milampornas sa Pitogo, 103-82, aron pagpahiluna sa ikatulong dapit sa SK division.
Si Arnold Responte miharos og 24 puntos alang sa Casili samtang sila si Reezan Gonzaga ug Clyde Alilin miamot og og 18 puntos matag usa.