CEBU, Philippines — Ang mga koponan sa Jugan ug Cabangahan miangkon og luna sa kampiyonato sa tagsa-tagsa nila ka dibisyon sa 14th Mayor Teresa "Nene" P. Alegado Cup Fiesta Basketball League didto sa Consolacion, Cebu.
Sa midget class, gi-sweep sa Jugan ang Cabangahan sa ilang best-of-three semifinal series uban ang kulbahinam nga daog, 56-53, sa Game 2.
Sila si John Broa, Jerick Rivera, ug James Clit Rosell nagkumbinar og 38 puntos alang sa Jugan, nga makigharong sa Pulpogan o Lamac sa finals. Ang Lamac nakaangkon pa og laing kinabuhi human gibaslan ang Pulpogan, 89-82, sa laing midget semis.
Si Cliff Raven Presbitero maoy nangu sa Lamac bitbit ang 35 puntos ug gisundan kini ni Kent Bryan Mendoza nga mihipos og 21 puntos.
Sa laing bahin, sila si Remart Jagdon ug John Kervin Garcia nagkumboya'g 33 puntos samtang si Marvin Devilla midugang og 11 puntos sa gihang gitagak sa Cabangahan ang Casili, 77-70, aron pagtikang sa kampiyonato sa SK category diin ilang makasangka ang Pulpogan o Pitogo.
Ang Pitogo mipuwersa og knockout match human nakaipsot ang Pulpogan pinaagi sa makapaisag balahibo nga desisyon, 85-84, luyo sa paningkamot nilang Jevie Pepito ug James Genos nga nagtambayayong pagmugna og 44 puntos.
Sa seniors level, ang Nangka naka-una batok sa Jugan, 102-92,sa ilang race-to-2 semis.
Sila si Romar Ponce ug Benson Culango dunay tinigom nga 41 puntos alang sa Nangka, samtang si Charles Singson midonar og 16 puntos.