CEBU, Philippines — Giablihan sa University of Cebu (UC) Webmasters ang ilang kampanya pinaagi sa usa ka masipang buto human ilang gipakaging ang Cebu Roosevelt Memorial Colleges (CRMC) Mustangs, 79-65, sa Cebu Schools Athletic Foundation, Inc. (CESAFI) Season 24 basketball tournament niadtong Domingo, Septiyembre 29, diha sa Cebu Coliseum.
Ang bag-o nilang batos nga si Jepherson Nonol maoy nangu sa balanseng ataki sa puwersa ni coach Kernn Sesante diin usa lamang sa 15 ka players nga iyang gipasud ang wala maka-iskor.
Ang Fil-Am guard gikan sa Houston, Texas mihipos og 12 puntos, usa ka rebounds, usa ka assist ug duha ka steals alang sa Webmasters, nga kontrolado kaayo ang duwa human misirit sa sayong 32-18 nga labaw nga ila pang giinat ngadto sa 50-31 sa halftime. Ang kinadak-an nilang bentaha nagbarog noon sa 21 puntos, 77-56, sa panapos nga minutos. Gawas nga nagkumbinar og 20 puntos, sila si Ray Charles Libatog, Mc Steven Ursal, ug Luther Leonard nagkumbinar sab og 32 ka rebounds hinungdan nga gilat-an sa Webmasters ang Mustangs sa rebounding, 77-30.
Si Keaton Taburnal mikadlit og 16 puntos ug lima ka rebounds, samtang si Redjhee Recimiento adunay 10 puntos, tulo ka rebounds, usa ka assist ug tulo ka steals apan way nahimo kay ang Mustangs nakatilaw sa ikaduha nilang sunod-sunod nga pilde.
Sa juniors division, sila si Jyle Andre Roa ug Lybron James Lamo parehong mi-iskor og 15 puntos ug nagkumboya og 14 ka rebounds, lima ka assists ug 11 ka steals sa dihang gibugha sa Cebu Eastern College (CEC) Dragons ang UCLM (University of Cebu Lapu-Lapu and Mandaue), 66-50, alang sa ikatulo nilang sagunson nga daog.
Sila si Mark Justin Parilla ug Reyvene Arobo dako sab og naambag human sila nakatigum og 15 puntos ug 22 ka rebounds.
Sa laing mga duwa sa high school, si Fritz Gonzales mipabuto og 30 puntos uban ang upat ka rebounds, usa ka assist ug tulo ka steals sa dihang ang University of Southern Philippines Foundation (USPF) Baby Panthers milampornas sa CRMC Baby Mustangs, 69-38, alang sa ikaduha nilang daog, samtang ang Don Bosco Technical College (DBTC) Greywolves nakabawi gikan sa mabugnaw nga sinugdanan aron tumbahon ang Benedicto College Baby Cheetahs, 72-69.
Si Angelo de la Cruz mibubo og 16 puntos ug upat ka rebounds alang sa Greywolves. Miamot si Jasheed Cyril Ybarra og 15 puntos, pito ka rebounds, upat ka assists ug tulo ka steals, samtang sila si Dirk Louis Baguio ug Isaac Go midonar og 10 puntos matag usa aron tabangan ang Bosconians paglansang sa una nilang daog.