CEBU, Philippines — Ang mga teams sa Lamac ug Pitogo milukat og ticket ngadto sa semifinals sa 14th Mayor Teresa “Nene” P. Alegado Cup Fiesta Basketball League didto sa Consolacion, Cebu.
Ang defending champion Lamac mitagak sa Cabangahan, 100-86, aron pag-angkon og luna sa best-of-three semis sa seniors division diin ilang sangkaon ang Pulpogan.
Sila si Cid Cortes ug James Ferraren, nga kanhi mga bitoon sa ilang panahon sa kolehiyo, maoy nangu sa Lamac. Si Cortes mipabuto og 28 puntos samtang si Ferraren mi-iskor og 14. Mihimo sab og kasikas si JJ Baguio sa Lamac uban ang 19 puntos. Si Matthew Miñoza mihipos og 22 puntos, si Kenneth Cada mitali og 19, samtang si Brevin Padayogdog mihipos og 11 puntos apan nakawang ang ilang paningkamot alang sa Cabangahan.
Sa SK category, ang Pitogo mibuntog sa Tolo-tolo, 107-100, aron pagmartsa ngadto sa Final Four. Sila si Chino Larrobis ug Jevie Pepito nagkumboya'g 43 puntos samtang si James Genos mitampo og 16 puntos alang sa Pitogo, nga makigharong sunod sa Pulpogan sa usa gihapon ka best-of-three series alang sa luna sa kampiyonato. Si Christian Manto mipupo og 27 puntos samtang sila si Jacob Bihag ug Gabriel Yap nagkubminar og 24 puntos apan nangahoyhoy ang ilang abaga kay nanamilit na ang Tolo-tolo sa torneyo.