CEBU, Philippines — Giharos og daog sa PPGT-A ang duha ka duwa batok sa SNC-A sa ilang best-of-three final series aron mahimong "back-to-back" champion sa Couples For Christ Inter-Chapter Basketball League Season 2.
Ang PPGT-A walay puangod nga milubong sa SNC-A aron masiguro ang ilang kadaugan sa tagakay nga Game 3 sa iskor nga 81-61 niadtong Domingo diha sa Casili gym sa Consolacion.
Sa Game 1, napilde ang PPGT-A, 74-78 apan namawi sa Game 2 sa iskor nga 87-75 aron malugwayan ang serye.
Hugot kaayo ang depensa nga gipatuman sa duha ka koponan ug walay bisan usa kanila gustong mabiyaan, apan sa fourth quarter milusad og 8-0 run ang PPGT-A nga maoy nahimong pabilo ug nihaling sa nagdilaab nilang opensa.
Si Jonnas 'Sakuragi' Cayanong ang napiling Finals MVP human ni-average og 29 points ug 12 rebounds matag duwa sa final series.
Usa sa nakatabang sa dakung nakuha nga iskor ni Cayanong mao si barangay Lamac councilor Roy Ermac pinaagi sa iyang mga pasa diin mi-average siya'g unom ka assists matag duwa sa tulo ka duwa sa finals.
Sa Game 3, si Cayanong miiskor og 26 puntos aron mangulo sa opensa sa PPGT-A, laing tulo niya ka teammates ang miligwat og double figures. Si Jonrey Luchavez mihakot og 11 puntos, samtang sila si Jayfox Owatan ug Jun Dahuya mitimbre'g 10 puntos matag usa. Miantog unta og 21 puntos si Raymil Fernandez, apan nakawang lang kay kuwang siya'g igong suporta gikan sa iyang kaubanan, si Chris Englis mihipos og 11 puntos sa napildeng SNC-A.
Human sa duwa gisunod dayon ang awarding ug gitapos pinaagi sa usa ka praise fest diin ang tanang Couples for Christ nikanta og religious songs agi'g pasalamat ngadto sa Ginoo.
Sa laing bahin, gipahibalo ni league commissioner Rene Jun Pastolero nga ang season 3 gitakdang sugdan sa Enero 26, 2025.