CEBU, Philippines — Ang ikaduhang season sa Kingpin Cebu Basketball League mi-arangkada na niadtong Dominggo, Septiembre 1, diha sa Cebu City Sports Institute (CCSI) Gym sa Barangay Sawang Calero.
Miabot ngadto sa 10 ka teams nga gibahin sa duha ka grupo ang mopakita'g aksiyon ning torneyo nga gipasiugdahan ni MNL Kingpin Cebu founder Isaac John Wahing inabagan sa Ubec Moto. Magpinaksitay sa Bracket A ang GSC Performance Fuels-Epic Ballers, Nicky’s Gadget, Tiger Shipping Builders Inc., Oninz Trading, ug El Makinista.
Samtang magbugno sa Bracket B ang Isorep, JD Customs Brokerage, Phenom, ug BSL Hoops uban ang Steadfast Builders o ang Cokaliong.
Moduwa sila ubos sa single round robin format sa eliminasyon. Ang top 4 moabante sa crossover semifinals diin ang mga mananaog maoy mag-abot sa best-of-three finals.
Ang makampiyon mobulsa og P80,000 samtang ang mopahiluna sa ikaduhang dapit makadawat og P20,000.