CEBU, Philippines — Dominante kaayo ang Sugboanong higante nga si June Mar Fajardo sa unang semana sa aksiyon sa PBA Governors’ Cup.
Nadasig sa ikawalo niyang MVP award, ang garbo sa Pinamungajan mituboy sa San Miguel Beermen ngadto sa duha ka sagunson nga daog.
Tungod niini, si Fajardo gibayaw nga unang Player of the Week ning lab-as nga season sa liga.
Iyang gipilde alang sa maong senemanang pasidungog sila si Robert Bolick sa NLEX, Rey Nambatac, Calvin Oftana ug Poy Erram sa TNT ug ang mga rookie sa Rain or Shine nga sila si Felix Lemetti ug Caelan Tiongson.
“Bagong conference, bagong season, pero same goal pa rin which is makalaro sa Finals at makakuha sana ng championship,” matud pa ni Fajardo.
Ang 34-anyos nga si Fajardo mi-average og 25.0 puntos, 17.0 rebounds, 4.5 assists, 1.5 steals ug 2.0 blocks sa nag-una nilang duha ka duwa diin ilang gipayaka ang Phoenix ug Blackwater.
Mirehistro siya og makalisang nga double-double nga 37 puntos ug 24 ka rebounds uban ang upat ka assists, duha ka steals ug duha ka blocks sa dihang gibugha sa Beermen ang Fuel Masters, 111-107, niadtong Agosto 21 didto sa Smart Araneta Coliseum.
Upat ka adlaw ang milabay, si Fajardo mikolekta og 13 puntos, 10 ka rebounds, lima ka assists ug duha ka blocks aron tabangan ang Beermen paglampornas sa Bossing, 128-108.