CEBU, Philippines — Si coach Jeff Cariaso nagpabiling masaligon sa kampanya sa Blackwater sa PBA Governors' Cup bisan pa man og nasugamak sila sa ikatulo nilang sagunson nga pilde niadtong Dominggo sa gabii. Sa pag-abot sa bag-o nilang import nga si Cameron Clark, nadungagan ang kadasig ni Cariaso nga ang Bossing makapakita pa og maayong labok sa nahibiling bahin sa komperensiya.
"There's still seven games left and we feel like once we get rolling, and hopefully this import will give us the spark that we need, then you never know what can happen," matud pa ni Cariaso human sa 128-108 nilang kapildihan sa mga kamot sa San Miguel Beermen didto sa Smart Araneta Coliseum.
"We're still very optimistic and very positive about this conference," dugang pa ni Cariaso.
Si Clark maoy mohulip ni Ricky Ledo, ang 31-anyos nga kanhi NBA player sa Dallas Mavericks ug New York Knicks nga gitagak sa Bossing tungod sa dili maayo niining gipakita sa nag-una nilang duha ka duwa diin sila giparotan saa Rain or Shine, 110-97, ug NLEX, 112-93.
Sa pagbakwit ni Ledo, ang Bossing mikumbati uban ang all-Pinoy lineup batok sa Beermen. Ang Blackwater gikatakda nga moparada ni Clark sa sunod nilang duwa batok saa Barangay Ginebra karong Biyernes.
Ang 32-anyos nga si Clark nakaduwa na kanhi sa NLEX ug San Miguel niadtong 2021 ug 2023 Governors' Cup.