CEBU, Philippines — Nagsugod na ang rehistrasyon alang sa duha ka training camps sa Sunsport Basketball karong Septiembre.
Ang beteranong coach ug tinamod nga skills trainer nga si Jojo Romarate-Teves maoy mangu sa developmental camp nga abli sa mga baskebolista nga nag-edad og siyete ngadto sa 19 anyos nga gustong makat-on sa ensaktong pamaagi pagduwa og basketbol ug mabaid og maayo ang ilang abilidad.
Ipahigayon kini sa duha ka mga binyu nga mao ang Sacred Heart Center Sports Club sa may D. Jakosalem Street, dakbayan sa Sugbo ug sa Sunsport Basketball Training Center nga nahimutang sa North Road National Highway tunga-tunga sa barangays Basak ug Canduman sa siyudad sa Mandaue.
Modagan sud sa upat ka mga Sabado sugod karong Septiembre 7, ang training sessions gikatakda gikan sa alas-9 ngadto sa alas-11 sa buntag didto sa Mandaue ug gikan sa alas-12 sa udto hangtud sa alas-2 sa hapon sa dakbayan sa Sugbo.
Ang rehistrasyon nagkantidad og P1, 200 apil na niini ang bola sa Sunsport ug jersey.
Alang sa dugang detalye, kadtong gusto moapil mahimong mokontak ni coach Jojo (0928-8295489) o sa opisina sa Sunsport (345-1015).