CEBU, Philippines — Ang duha ka NBA superstars nga sila si LeBron James sa Los Angeles Lakers ug Giannis Antetokounmpo sa Milwaukee Bucks gisang-onan sa mahinungdanong tahas pagkupot sa bandila sa tagsa-tagsa nila ka mga nasud sa pormal nga pagbukas sa giatngan nga 2024 Paris Olympics karong Biyernes didto sa nabantog nga River Seine sa France.
Si James, ang all-time leading scorer sa NBA, maoy mangu sa Team USA sa tradisyonal nga parada sa mga atleta nga maoy sentro sa atraksiyon sa engrandeng seremonyas nga mosikad sa prestihiyosong torneyo nga mahitabo kausa lamang sud sa upat ka tuig.
Mismo ang mga kauban niyang Olympians maoy mipili sa 39-anyos nga si James nga mobitbit sa simbolo sa tinipong bansa sa Amerika. Alang ni James, usa kini ka dakong dungog nga iyang gidawat sa tumang kahinangop.
"It's an incredible honor to represent the United States on this global stage, especially in a moment that can bring the whole world together," matud pa ni James, nga nakadaog og Olympic gold medal duha na ka higayon niadtong 2008 ug 2012.
"For a kid from Akron, this responsibility means everything to not only myself, but to my family, all the kids in my hometown, my teammates, fellow Olympians and so many people across the country with big aspirations."
"Sports have the power to bring us all together, and I'm proud to be a part of this important moment," dugang pa sa four-time NBA champion. Sa iyang bahin, ang two-time NBA MVP nga si Antetokounmpo modala og susamang papel sa pinangga niyang yutang natawhan nga Greece. Si Antetokounmpo maoy nangu sa Bucks paglangkat sa korona sa NBA niadtong 2021. Ning higayona, bulawang medalya sa Olympics ang buot niyang makab-ot sa mabulokon niyang karera.