Sports events molamas sa Kinabayo Festival sa Dapitan

CEBU, Philippines — Usa ka serye sa mga kalihukan sa paugnat sa kusog ang modugang sa kabibo ug kasadya sa engrande nang daan nga Kinabayo Festival, usa ka tinuig nga kasaulogan sa pista sa dakbayan sa Dapitan agi'g pagyukbo sa minahal nilang patron nga si Señor Santiago Apostol. 

Unang ipahigayon ang Rizal Cup Golf Tournament didto sa world-class Dakak Golf Club karong Sabado, Hulyo 20. Magsugod ang hinapakay sa alas-8 sa buntag.

Sunod adlaw (Dominggo, Hulyo 21), tulo ka mga aktibidades ang gipaabot nga molingaw sa mga katawhan. Kini mao ang Bugsay' Aquathlon, ang 1st Dapitan Kinabayo Mayor Bullet Horse Show, ug ang Invitational Mixed Martial Arts (MMA) fight card.

Motak-op sa duha ka semanang pasundayag nga hugtanong gipaluyohan ni Dapitan Mayor Seth Frederick "Bullet" Jalosjos mao ang half-marathon race sa Hunyo 28.

Sa milabayng mga katuigan, ang nabantog nga "Shrine City of the Philippines" migamit sa sports isip usa sa ilang mga instrumento aron palig-onon ang industriya nila sa turismo.   

Timaan niini, ang mga Dapitanon nakapasiugda na og pipila ka mga dagkong torneyo, national ug international, sa arnis, chess, MMA, ug triathlon.

Sa miaging tuig, ang labing unang 5150 Triathlon Dapitan nga dunay pagtugot sa Ironman Group naka-agni og gatusan ka mga langyaw nga atleta gikan sa nagkadaiyang dapit sa kalibutan.