Derozan nalandig sa Kings, Saric mibalhin sa Nuggets

CEBU, Philippines — Ang six-time NBA All-Star guard nga si DeMar DeRozan miuyon sa tulo ka tuig nga konrata uban sa Sacramento Kings human sa usa ka trade nga naglangkob og tulo ka teams kagahapong adlawa.

Sigun sa nakab-ot nga kasabotan sa hintungdan nga mga koponan, si DeRozan mobiya sa Chicago alang sa Kings, samtang si Harrison Barnes ug usa ka draft pick sa umaabot adto mapunta sa San Antonio Spurs ug si guard Chris Duarte uban ang duha ka second-round draft picks ang makuha sa Bulls.

Gitaho sa ESPN nga si DeRozan makadawat og $74 million gikan sa Kings sud sa tulo ka seasons diin iyang makauban sila si All-Star guard De'Aaron Fox ug All-Star center Domantas Sabonis.

Si DeRozan, 15 ka tuig nga beterano sa NBA, mi-average og 24.0 puntos, 5.3 assists, 4.3 rebounds ug 1.1 steals uban sa Bulls.

Samtang si Barnes makig-alyansa nilang Chris Paul ug 2024 NBA Rookie of the Year center Victor Wembanyama didto sa San Antonio.

Sa laing bahin, si Croatian forward Dario Saric mitapon sa Denver Nuggets ubos sa duha ka tuig nga kontrata nga mibalor og $10.6 million.

Ang 30-anyos nga sentro miduwa uban sa Golden State Warriors sa miaging season. Sa walo ka tuig niyang karera, mi-average siya og 10.6 puntos ug 5.4 rebounds sud sa 477 ka duwa.