CEBU, Philippines — Si Paul George makig-uban sa Philadelphia 76ers, samtang si Klay Thompson magsul-ot na sa uniporme sa Dallas Mavericks sa sunod nga NBA season.
Ang nine-time All-Star nga si George, nga mibalibad sa gitanyag kaniyang $48.8 million sa Clippers alang sa 2024-25 season, nakig-alyansa sa Sixers ubos sa upat ka tuig nga kontrata nga mibalor og $212 million.
Ang 34-anyos nga si George mi-average og 20.8 puntos, 6.3 rebounds, 3.7 assists ug 1.7 steals sud sa 867 ka duwa sa miaging 14 ka tuig uban sa Indiana Pacers, Oklahoma City Thunder, ug Clippers.
Ang pag-abot ni George seguradong makapalig-on sa puwersa sa Sixers kauban silang Joel Embiid ug Tyrese Maxey, nga magpabilin sa Philadelphia luyo sa lima ka tuig nga maximum contract extension nga nagkantidad og $204 million.
Nakuhaan hinoon og usa ka sinaligan ang Sixers gumikan kay si Tobias Harris gibira sa Detroit Pistons pinaagi sa duha ka tuig nga kontrata nga mibalor og $52 million.
Samtang si Thompson, kansang pagbiya sa Golden State Warriors nakompirmar niadto lamang Lunes, mi-uyon sa tulo ka tuig nga kontrata uban sa Mavs nga nagkantidad og $50 million.
Didto sa Dallas, si Thompson moporma og laing "super team" kauban silang Luka Doncic ug Kyrie Irving.
Si Thompson nakadaog og upat ka korona sa NBA niadtong 2015, 2017, 2018 ug 2022 sud sa poder sa Warriors kauban silang Stephen Curry ug Draymond Green.
Sa laing bahin, si Jayson Tatum nagpahigot sa Boston Celtics pinaagi sa lima ka tuig nga supermax contract extension nga nagkantidad og $315 million.
Sa kantidad nga $63 million matag tuig, mao kini ang kinadak-an nga kontrata sa kasaysayan sa NBA/
Gawas ni Tatum, magpabilin sab sa Celtics sila si Jalen Brown, Derrick White, Jrue Holiday, ug Kristaps Porzingis.