CEBU, Philippines — Nagmangtas na sab si Donovan Mitchell aron pangulohan ang Cleveland Cavaliers ngadto sa 106-94 nga pagpatikangkang sa Orlando Magic, 106-94, sa tinagakay nilang Game 7 sa NBA Eastern Conference first-round playoff series kagahapon didto sa Rocket Mortgage Fieldhouse sa Cleveland, Ohio.
Duha ka adlaw sukad siya mibomba og 50 puntos sa kadaogan sa Cleveland sa Game 6, si Mitchell mitagak og 39 puntos aron ituboy ang Cavs ngadto sa East semifinals.
Ning higayona, si Mitchell nakakuha og igong suporta gikan sa iyang mga kauban sa dihang ang Cavs madasigong mipapas sa 18 puntos nilang alkansi sa first-half aron paglagpoton ang Magic.
Si Caris LeVert mi-iskor og 15 samtang si Max Strus mitali og 11 sa iyang 13 puntos sa ikatulong kuwarter diin gilabhan sa Cavs ang Magic, 33-15, aron kontrolahon ang duwa sa hingpit.
Mihimo sab og kasikas si Evan Mobley uban ang 11 puntos, 16 ka rebounds ug lima ka blocks ingon man si Darius Garland nga mitampo og 12 puntos alang sa Cavs nga nakasugakod sa 38 puntos nga eksplosyon ni Paolo Banchero.
Bukid pa hinoon ang tungason sa Cavs gumikan kay ilang banggaon sunod mao man ang top seed nga Boston Celtics.
Apan si Mitchell nagkanayon nga andam silang atubangon ang koponan nga miposte sa labing nindot nga rekord sa regular season.
"We didn't make the group we made just to win the first round," dason pa ni Mitchell. "We accomplished one goal. Now we have to do it again."
Ang Celtics maoy mo-host sa Cavs sa Game 1 sa ilang East semifinal series karong Miyerkules.