CEBU, Philippines — Kasado na ang tanan alang sa Run Kings Mountain Run nga gikatakda karong Dominggo, Abril 28, didto sa Barangay Yati, Liloan, Cebu.
Ang talagsaon nga karera gituyo aron i-promote ang eco ug sports tourism industry ning lungsoid sa amihanang bahin sa Sugbo nga nailhan sa lamian nilag rosquillos ug masi.
Gikan sa Yati, ang mga partisipante mo-agi sa tulo ka bukirang mga barangay sa Santa Cruz, San Roque ug Lataban.
Giorganisa sa CSAS, Team Viva Events, Move ni Kath Jumapao, ug Liloan LGU ubos sa pagpangu ni mayor Aljew Frasco, ang kulbahinam ug makutas nga lumba naglangkob og 4K, 8K, ug 12K nga mga kategoriya sa mga babaye ug lalaking managanay.
Ang mga kampiyon sa tanang tulo ka dibisyon mobulsa og parehong premyo nga P7,000, samtang ang mopahiluna sa ikaduha ug ikatulong dapit makawawat og P3,000 ug P1,000.