CEBU, Philippines — Pulpogan, Consolacion Headers nanghawod sa sepak takraw
Ang Team Pulpogan ug Consolacion Headers midominar sa tagsa-tagsa nila ka dibisyon sa sepak takraw event sa 12th Alegado Cup sports festival didto sa Consolacion, Cebu.
Gipakaging sa Pulpogan ang Poblacion Occidental aron birahon ang korona sa men's catergory. Ang Tayud mipahiluna sa ikatulong dapit human gilupig ang Jugan.
Sa women's division, ang Consolacion Headers maoy gikoronahang hara human mipatigbabaw batok sa Calero Liloan. Ang Cebu City mipiog sa Mandaue aron paglandig sa ikatulong puwesto.
Ang kompetisyon ubos sa superbisyon sa Consolacion Headers Sepak Takraw Club, Inc. nga gipangulohan sa presidente nilang si Wendell S. Acabal. Si international referee Marlon S. Gicain nagsilbeng tournament director samtang sila si national referee Arnold A. Niedo ug international referee Herbert Tabasa maoy mga managers.
Ang officiating officials naglangkob nilang Richa Mae Y. Niedo, Marry Ann Q. Sanchez, Mitodio Suico Jr., Regie Sanchez, Ryan Indino, Jamesle Pitogo, Marlou Semblante, Jarwen Bataluna, ug Jeramel Trillo.
Nahimo kining posible pinaagi sa suporta ni SK Federation President Carlos Donn Flores, ang sports overall chairman, uban sa iyang co-chair nga si konsehal Marilou Casul ug sports consultant Paul Alelu Flores.