Garing kampiyon gihapon sa SK category B

CEBU, Philippines —  Ang Team Garing mipaksit sa Tolo-tolo, 81-72, aron paglangkat og duha ka sagunson nga titulo sa SK category B sa 12th Mayor Teresa "Nene" P. Alegado Cup Fiesta Basketball League didto sa Consolacion, Cebu.

Si Devonn Alin mipupo og 23 puntos samtang si team captain Vonn Xyle Tundag ug Duh Murphy Duron nagkumbinar og 29 puntos alang sa Garing, nga milusad og mura'g bagyo nga opensiba sa ikaduhang kuwarter aron labhan ang Tolo-tolo.

Abante lamang og singko puntos, 27-22, human sa nag-unang 10 minutos sa aksiyon, ang Garing ni coach Rogen Nudalo mitagak og makalisang nga 35-14 nga bomba aron paburoton ang ilang labaw ngadto sa 26 puntos sa halftime, 62-36.

Wala na sila molingi pa sukad niadto.

Sa laing bahin, ang Cabangahan ug Pulpogan naka-angkon pa og laing kinabuhi.

Ang Cabangahan mipayaka sa Casili, 104-68, aron pagpuwersa og tinagakay nga duwa sa ilang best-of-three finals sa SK category A, samtang ang defending champion Pulpogan midan-ag pa sa ilang kampanya nga mapanalipdan ang ilang trono human gilampaso ang Poblacion Oriental, 105-87, sa senior category A.

Sila si JC Escalona ug Harold Javier miharos og 25 puntos matag usa samtang si Rexon Moneva miamot og 14 puntos alang sa Pulpogan nga mipuwersa og rubbermatch batok sa Poblacion Oriental diin ang modaog mo-abante sa kampiyonato.