CEBU, Philippines — Si Jason Bandal sa Integrated Bar of the Philippines (IBP)-Negros Oriental Chapter maoy milugwa nga kampiyon sa 3rd Lawyer's Gambit Chess Championships nga giduwa pinaagi sa online platform niadtong weekend.
Gihuman ni Bandal ang pito ka hugna nga kompetisyon nga way pilde hinungdan sa pagsakmit niini sa titulo.
Sila si Jose Dionisio "Jong" N. Guevarra sa IBP-Davao, Manuel Zosimo Ozoa sa IBP-Cebu City, ug Woman FIDE Master Sherily Cua sa IBP CalMaNa parehong mitali og 5.0 puntos apan si Guevarra ang mipahiluna sa ikaduhang dapit kortesiya sa mas taas niining tiebreaker.
Sila si Ozoa ug Cua mi-okupar sa ikatulo ug ikaupat nga puwesto.
Si Lawrence Earl Roy Gersalia sa IBP-Sorsogon nagsolo sa ikalimang luna uban ang 4.5 puntos.
Naglangkob sa top 10 bitbit ang 4.0 puntos matag usa mao sila si Aldwin Alegre sa IBP Rizal-RSM, Gaudioso Melendez sa IBP-Cebu City, Jeah Jean E. Gacang sa IBP-Cebu, Rodrigo Aquino Jr. sa IBP-Nueva Ecija, ug Aris Montilla of IBP-Masbate.
Sa laing bahin, sila si Sherily Cua sa IBP-CalMaNa, Jeah Jean Gacang sa IBP-Cebu ug Ma. Rowena Goc-ong sa IBP-Leyte maoy top 3 lady players sa torneyo nga gipasiugdahan sa IBP-Cebu Chapter inabagan sa Professional Chess Association of the Philippines (PCAP).