Cebu Locksmith nidaog na gyud
CEBU, Philippines — Nakatagamtam na gyud og daog human sa lima nga pagsulay ang Cebu Locksmith dihang ilang giposasan ang CJL Sniper, 64-54 sa Ranny Colansi Cup 2023 niadtong Domingo diha sa Ateneo de Cebu sa Mango Avenue, Cebu City. Hinugtanay sa bakus ang nahitabong duwa sa duha ka koponan ug napamatud-an kini dihang nagpuli-puli kini'g angkon sa labaw gikan pagsugod hangtod sa katapusang kuwatro minutos sa fourth quarter.
Diha na midistansya ang Cebu Locksmith dihang milusad sila og mainitong rally ubos sa pagpangulo sa ilang higanteng sentro nga si Berlenard Acero, kinsa mikayod sud sa baseline.
Si Acero nga mihimo'g double-double sa iyang 17 puntos ug 10 ka rebounds uban ang upat ka assists maoy best player of the game, samtang sila si Charlee Lumasag ug Joshua Banaag mitampo'g 15 ug 10 puntos sa Cebu Locksmith ni Nestle Key Flores.
Gumikan niini, ang Cebu Locksmith ug CJL parehong nagbitbit og 1-4 nga baraha ning maong liga nga gipadagan sa Brothers Ball League ubos sa liderato ni Marvin Sillar.
Ang CJL ni James Lapinig gipangulohan ni Johnas Malubay sa iyang 17 puntos, gisundan ni Farley Jewel Monterola nga dunay 12 puntos.
Sa sayo pa, ang JSV Cuisine ni Jeremias Vestra miiskor sab og daog batok Donling Aircon Refrigeration Services ni Romeo Quilaton Jr., 66-54 ubos sa pagpangulo sa best player niining si Dan Cardenas nga mikabkab og 25 puntos, upat ka rebounds ug lima ka assists.
Si Charly Ocanada miabuno'g 15 puntos, samtang si Jason Inocencio mikubkob og 12 puntos sa JSV nga padayong nag-una sa standing uban ang 4-1 nga baraha.
Ang Donling nga aduna'y 3-2 record gipangulohan nilang Ace Despi, Angelo Ponce ug James Carl Lumoya nga parehong mitali'g 15 puntos.
- Latest
