CEBU, Philippines — Ang sapatos nga gisul-ot ni NBA legend Michael Jordan atol sa nabantog nga "Flu Game" niadtong 1997 NBA Finals nahalin sa usa ka auction sa kantidad nga $1.38 million. Gipahibawo kini sa Goldin memorabilia marketplace kagahapong adlawa.
Ang maong mga sapatos kabahin sa kasaysayan alang ni Jordan ug sa Chicago Bulls, nga nakadaog og unom ka NBA titles niadtong 1990s. Ang Bulls ug ang Utah Jazz nagtabla sa baraha nga 2-2 niadtong 1997 best-of-seven NBA Finals sa dihang si Jordan nayayay, gihilantan ug na-dehydrated tungod sa stomach virus apan miduwa gihapon uban sa Bulls sa Game 5.
Si Jordan mi-iskor og 38 puntos sud sa 44 minutos ug nakapasud sa krusyal nga 3-pointer sa hilimatyong segundos nga nagtuboy sa Bulls ngadto sa 90-88 nga kadaogan. Mao sab kadto ang bugtong pilde sa Jazz didto sa ilang korte sa playoffs. Ang Bulls milangkat sa korona sud sa unom ka duwa ug si Jordan maoy gibayaw nga Finals MVP.
Ang maong sapatos, nga gipanag-iya sa kanhi ballboy sa Jazz, una nang nahalin sa auction 10 ka tuig na ang milabay sa kantidad nga $105,000.