3K's nidaog gyud sa 2OT sa LBA caging
CEBU, Philippines — Dili lang usa, kon dili duha gyud ka overtime ang naagihan sa 3K's una nila mataak ang kutas nga kadaogan batok sa VT Boys, 110-107 sa LBA basketball tournament niadtong Miyerkules diha sa Lamac gym sa Consolacion, Cebu.
Labaw ang VT Boys og 18 puntos sa third period, apan ang maong labaw gihinayag kitkit sa 3K's hangtod naapsan ug sukad niadto nagpuli-puli na sila'g ilog sa labaw. Tungod sa kadugay sa duwa, lima ka 3K's players na-fouled out apil na niini si Kiko Palero nga maoy topscorer uban ang 24 puntos, samtang tulo sa VT Boys ug usa na niini si Dr. Genaro 'Jun' Borces.
Ang VT Boys labaw og tres puntos sa second overtime, apan misikit ang 3K's pinaagi sa duha ka free throws ni Kyor.
Si Kyor mao sab ang responsabli sa kadaogan sa 3K's human masulod ang jumpshot niya sa nahabiling kuwatro segundos sa second overtime.
Nagdala'g rally sa 3K's atol sa second half mao si Palero gikan sa mga assists ni Kyor. Dihang na-fouled out si Palero, si Kyor mao na ang mirumbo sa opensa uban nilang Atty. Monares ug Lloyd Chavez.
Ikaduhang topscorer sa 3K's mao si Rio Quijano sa iyang 18 puntos, gisundan ni Kyor nga adunay 15 puntos, samtang sila si Monares ug Chavez nag-amotay og 12 puntos.
Sa lain pang mga duwa, ang Azitron midaog sa Jed'B sa iskor nga 90-79 ug midaog na sab ang Never Give Up batok Malunggay, 73-64.
- Latest
