CEBU, Philippines — Si Paolo Banchero mikadlit og 23 puntos sa dihang gipakgang sa Orlando Magic ang siyam ka sagunson nga daog sa Boston Celtics, 113-98, sa NBA kagahapon didto sa Amway Center sa Orlando, Florida.
Gawas ni Banchero, laing upat pa ka players sa Magic ang mitali og double-figures apil na sila si Wendell Carter Jr. ug Franz Wagner nga nagkumboya'g 36 puntos.
Mihimo sab og impresyon si Jonathan Isaac sa labing una niyang duwa uban sa Magic sukad niadtong Agosto 2020.
Si Isaac, nga gihamok og mga injury sa miaging duha ka tuig, mipupo og 10 puntos, tulo ka rebounds ug duha ka steals sud lamang sa 10 minutos.
Sila si Jayson Tatum ug Jaylen Brown parehong mitali og 26 puntos sa pilderong Celtics.
Sa laing duwa, sila si Giannis Antetokounmpo ug Khris Middleton nagparamdam dayon sa ilang pagbalik gikan sa injury human gituboy ang Milwaukee Bucks ngadto sa 150-130 nga demolisyon sa Detroit Pistons.
Si Antetokounmpo mikolekta og 29 puntos, 12 ka rebounds ug upat ka assists samtang si Brook Lopez midugang og 21 puntos alang sa Bucks, nga nagkupot na karon og 30-17 record aron pagpabilin sa sa ikatulong dapit sa Eastern Conference sunod sa Celtics ug Philadelphia 76ers.