CEBU, Philippines — Ang mga Sugbuanong seklista dunay angayan nga pagalantawon sa unahan gumikan kay ang Sacred Heart School-Ateneo de Cebu (SHS-AdC) Batch 1992 inabagan sa Batch 2007 mopahigayon sa "Elevate Race to the Top" karong Dominggo, Disiembre 18.
Ang makutas nga lumba magsugod sa alas 5:30 sa buntag didto sa Sacred Heart School-Jesuit old campus sa General Maxilom Avenue ug mahuman sa Tops Cebu alang sa mga elite ug age-groupers ug sa Gaslamp District sa mga partisipante sa novice category.
Gawas sa tropeyo, ganting salapi ang ipang-apudapud sa mga manaog.
Ang top 3 finishers mobulsa og P20,000, P15,000, ug P10,000 sa male elite ug P10,000, P5,000, ug P3,000 sa female elite.
Samtang ang top 3 sa nagkadaiyang mga age-groups (male 18-29, 30-39, 40-49, ug 50-above) mokubra og P5,000, P3,000, ug P2,000.
Ang kita sa maong kalihukan alang sa mahinungdanong kawsa nga gipaluyohan sab sa Sangguniang Kabataan Federation (SKF) sa dakbayan sa Sugbo ug sa 3rd Civil Relations Group (AFP) idonar ngadto sa Operation Second Chance (Children in Conflict with the Law).
Kadtong interesado mosalmot gihatagan kutob lamang karong Miyerkules, Disiembre 14, aron magparehistro. Ang rehistrasyon nagkantidad og P888 apil na niini ang usa ka Salt+Fin cycling shirt ug libreng pamahaw sa The Daily Grind (TDG) sa Gaslamp.
Puydeng magparehistro sa Salt+Fin-Holiday Gym & Spa, Bikes & Brews (Albur’s Resto compound), ug The Daily Grind-Gaslamp. Alang sa dugang detalye, mahimong mobisita sa Elevate Race to the Top Facebook page.