CEBU, Philippines — Ang University of Cebu (UC) Webmasters nagtinguha nga moposte og krusyal nga daog aron pahayagan ang ilang tsansa nga makasud sa semifinals sa 2022 Cebu Schools Athletic Foundation, Inc. (CESAFI) basketball season.
Apan malisud nga tahas ang ilang sagubangon gumikan kay ang ilang banggaon mao man ang haring gangis nga University of the Visayas (UV) Green Lancers karong alas-5 sa hapon sa Cebu Coliseum.
Mihaw-as gikan sa kapildihan ang duha ka kampo.
Ang Webmasters nahagba na sab batok sa University of San Carlos (USC) Warriors, 77-80, samtang ang Lancers nakatilaw sa una nilang pilde sa mga kamot sa University of Southern Philippines Foundation (USPF) Panthers, 56-59.
Samtang ang Lancers segurado na og luna sa Final Four bitbit ang 7-1 win-loss record, ang Webmasters makigbisog pa aron maka-abante sa sunod nga hugna sa duha ka bulan nga torneyo.
Uban ang 3-4 nga baraha, ang Webmasters ni coach Kernn Sesante obligado nga modaog og duha sa katapusang nilang tulo ka duwa sa eliminasyon aron buhion ang ilang paglaum nga makatikang sa semis.
Sa laing bahin, ang City of Bogo Science and Arts Academy (CBSAA) Trailblazers ni coach Leode Garcia mosuway paginat sa way pilde nilang ratsada ngadto sa 7-0 sa dihang ilang sangkaon ang 3-3 nga UV Baby Lancers sa alas 330 sa hapon.
Sa ubang mga duwa sa juniors division, ang USC Baby Warriors makigtige sa UCLM sa alas 12:30 sa hapon samtang ang USPF Baby Panthers makigharong sa Cebu Eastern College (CEC) Dragons sa alas-2 sa hapon.